Featured Local

N.V. ELMAR ta relata riba e black-out di 22 di augustus 2022


– Alrededor di 4.47 am Aruba henter a keda sin coriente. N.V. ELMAR di biaha a mobilisa tur tecnico pa asina ta pendiente di e situacion. For di WEB Aruba N.V. a ricibi informacion cu ta debi na problema cu a surgi den nan planta a causa un black-out.

Pa mas o menos 6.30 AM N.V. ELMAR a wordo notifica door di WEB Aruba N.V. cu por a cuminsa suminstra coriente bek den algun area. Pos Chiquito, Balashi, Santa Cruz a ricibi coriente prome, sigui pa 6:55 am na e area di Paardenbaai. Pa 6.58 am na Bubali y vecindario. Pa 7.15 am na e area di Palm Beach. Pa 7.23 am na e area di Paradera y Dakota a ricibi coriente.

Pa 8:06 am a surgi un biaha mas un problema den e planta di WEB Aruba N.V. cu a ocasiona un di dos black-out. Pa 8:50 am na Balashi, Pos Chiquito, Santa Cruz, un parti di Paradera, aeropuerto Reina Beatrix y vecindario, e area di high-rise hotels na Palm Beach a ricibi coriente, sigui pa 9:23 am na Pos Abao, Bubali, e area di low-rise hotels na Palm Beach, dr. Horacio Oduber Hospitaal, Tanki Leendert, Ponton y Shaba.

Pa 9:50 am un problema a surgi un biaha mas den planta di WEB Aruba N.V. cu a haci cu N.V. ELMAR a hay’e confronta cu un interupcion den distribucion di coriente den e area di Ponton, y pa 10:13 am den area di Tanki Leendert y Shaba. Nos tecniconan a keda “stand-by” pa asina cu WEB Aruba N.V. soluciona e problema, nos por sigui suministra coriente den e areanan afecta.

Pa 10:22 am na e area di Tierra del Sol, e area di Hotel, Oranjestad, Seroe Blanco, Ponton, Tanki Leendert y Shaba a ricibi coriente. Pa 10:47 am N.V. ELMAR a confronta interupcion den suminstro di coriente den Zandstraat den area di Djiespie’s. Esaki ta debi na un transformer na candela. Nos tecniconan a mobilisa pa atende cu esaki. Pa 10:53 am a cuminsa suminstra coriente na San Nicolas y pa 11:08 am na ful San Nicolas tabatin coriente. Pa 11:11 am e suministro di coriente a ser reestableci den tur area afecta, menos den area di Zandstraat. Pa 1:52 pm e suministro di coriente a wordo reestableci na Zandstraat.

Durante henter e proceso aki N.V. ELMAR a keda monitor e stabilidad y suministro di coriente, pa motibo cu e instabilidad di energia di WEB Aruba N.V. lo por afecta cliente di N.V. ELMAR.

For di e momento di e black-out nos tecniconan tabata den comunicacion constante cu WEB Aruba N.V.. Alabes N.V. ELMAR a percura pa mantene pueblo constantemente informa via su pagina di Facebook.

N.V. ELMAR ta gradici e comunidad di Aruba pa e pasenshi durante e interupcion den distribucion di coriente cu tabata fuera di nos alcance. Alabes N.V. ELMAR ta gradici su tecniconan y team completo cu a traha incansabel pa atende cu e black-out te ora cu e ultimo area afecta a wordo suministra bek cu coriente.

Related posts

Ta importante pa habri oportunidadnan den mundo medico na Aruba

EA News Author

Minister Rocco Tjon ta lamenta cu oposicion ta indica cu FASE a keda intruduci sin transparencia

EA News Author

Un yamada na nos hobennan: den vakantie por sali midi matanan y registra esakinan

EA News Author

Leave a Comment