Habitantenan di Okra Road, South Reward, a haci un apelacion na autoridadnan pa tuma accion urgente despues cu 4 cacho di e rasa pittbull a ataca un obrero Haitiano residencia na Sint Maarten. Tabata dialuna 11 di augustus mainta trempan ora cu sr Alex Jones a wordo ataca y herida pa e animalnan, casi a perde su bida debi na e heridanan ricibi.
Jones a lucha contra e 4 cachonan agresivo y a wordo hiba St. Maarten Medical Center (SMMC) pa tratamento di su heridanan. Segun testigonan cu ta biba den Okra Road, e atake tabata asina severo cu Jones a perde conocemento riba caya y mester a wordo transporta cu ambulance pa SMMC,caminda Jones mester a wordo someti na cirugia di emergencia. Den su lucha desespera, e handyman a logra tapa su cara y su nek – un acto cu sigur a salba su bida di e 4 animalnan cu a atake.
Habitantenan a subraya cu esaki no ta un atake isola, pero cu ya e atakenan aki ta birando constantemente den e bario y esaki tin algun residente preocupa cu loke por pasa. Recientemente tin un total di 3 persona mas cu a wordo mordi pa e cachonan, entre nan un mucha. Nan ta preocupa cu e escalacion di e atakenan debi cu Okra Road ta un caya dead end. Ora cu nan pasa dilanti e propiedad unda e cachonan ta, e doño di e propiedad ta purba intimida, menasa cu atakenan y menasanan verbal. Aunke e doño di e pittbullnan a wordo avisa den pasado pa autoridadnan, pa lanta un cura of un haula.
E cachonan ta keda liber sin ta den un jaula y ta un riesgo pa seguridad publico. Ban spera cu autoridadnan di Sint Maarten actua cu man duro pa preveni mas atake cu por escala y bira un atake fatal. Sr Alex Jones mientras tanto casi a perde su dedenan y lo keda cu e marcanan visibel di e atake brutal aki.