Djabièrnè 21 di òktober, e barku krusero Norwegian Prima a bishitá nos isla pa promé biaha. Kapitan di haf Gunther Flanegin i Miles Mercera (TCB) entre otro a yama bonbiní na kapitan Roger Gustavsen, General Manager Martin Ivanov i tripulashon. Aki e kapitan a risibí un foto di e barku ku tabata drenta nos haf i un suvenir trahá na man. Riba e barku tabatin 2.166 pasahero na bordo, di kua mas ku 1.000 a partisipá na tour i aktividat na Boneiru ku nan a buk delantá. Norwegian Prima ta un barku krusero nobo den e segmento mas haltu, ku un kapasidat máksimo di 3.099 pasahero. Norwegian Cruise Line ta hasi su esfuerso pa yega na un impakto positivo riba komunidat i medio ambiente i su mishon ta pa kontinuamente mehorá sostenibilidat pa medio di inovashon nobo.
