Kiebro na akomodashon turístiko
Djaweps 21 di ougùstùs a drenta keho di kiebro na un akomodashon turístiko situá na Kaya Saturnus. Deskonosínan a haña akseso na un apartamentu i a bai ku entre otro dos iPad, dos Airpod, un oloshi di oro, un GoPro, un brel di solo i diferente prenda. Ta investigando e kaso.
Ladronisia di baiskel (fatbike)
Djaweps 21 di ougùstùs a drenta keho di ladronisia di un baiskel eléktriko (fatbike) koló pretu, tipo V-8. E baiskel tabata stashoná na lòk, dilanti di un kas na Kaya Sabana i deskonosínan a bai kuné. Ta investigando e kaso.
A konfiská skuternan
Djárason 20 di ougùstùs, durante kòntròl na un propiedat na Kaya Victoria, a topa ku tres skuter, probablemente prosedente di ladronisia. A konfiská e skuternan pa mas investigashon.
Ladronisia di bateria di trùk
Djárason 20 di ougùstùs a drenta keho di ladronisia i destrukshon riba tereno di un kompania na Kaya Industria. Deskonosínan a bai ku dos bateria di un trùk. Ta investigando e kaso.
Ladronisia na garashi
Djárason 20 di ougùstùs a drenta keho di ladronisia na un garashi situá na Kaya Monseigneur Nieuwindt. Deskonosínan a bai ku vários hèrmènt entre otro tres mashin di bora, dos sleiptòl i dos kargadó. Ta investigando e kaso.
Detenshon pa ladronisia
Djárason 20 di ougùstùs, alrededor di 7.50 or di anochi, a detené un hòmber di inisial J.R.A. di 54 aña di edat na Kaya Dr. Jose Girigorio Hernandez pa ladronisia. A rekonosé e sospechoso riba imágennan di kámara mientras e tabata kometé ladronisia na un negoshi. Na un propiedat ku e sospechoso tabata, a konfiská vários artíkulo ku ta relevante pa e investigashon. Investigashon den e kaso ta kontinuá.
Bo a mira algu sospechoso? Yama 717 8000 òf e liña di tep anónimo 9310.