Tur hotel rond Aruba tin mester di trahado, uno mas cu e otro pero a tuma luga un tipo di “shift” riba e sector turistico, caminda hotelnan nobo ta ranca trahadonan di otro hotelnan, pa bay traha cu nan y na e momentonan aki, no por papia di un crisis pero e situacion ta cerca di bisa un crisis. Awo hotel nan ta habri pa tuma pensionadonan of nan ta wordo discrimina aunke nan ta profecional?
Ya caba na varios hotel tin trahadonan cu tin cu traha sikiera un bes pa siman, e asina yama “double shift” ya cu no por haya suficiente trahado pa yega e vacaturanan cu tin y e situacion ta bayendo for di man y esaki ta rekeri atencion di gobierno y tambe sindicatonan.
OPPA recientemente a pidi pa no discrimina pensionadonan y por bisa cu e momento a yega, pa pensionadonan wordo permiti pa drenta e mercado laboral, principalmente den e sector turistico, pa di e forma aki nan yuda alivia e scarsedad cu tin na e momentonan aki.
Tin hopi pensionado cu ainda ta hopi “hoben” apesar cu nan a yega nan edad di pensioen pero nan ta ser manda cas caminda nan no tin mucho di haci pero pa gran parti di e grupo aki, tin pensionadonan cu lo kier tin algo di haci pa asina mata nan tempo liber di cana rond sin haci nan mes util.
Minister di Labor Cicilia tin cu atende e asunto aki tanto den Conseho di Minister mas pronto posibel pa asina analisa e situacion cu tin y hunto cu participacion di SvB, trata di crea un scenario caminda por permiti pensionadonan drenta bek e mercado laboral y yuda den e sector turistico caminda e demanda ta mas grandi.
Na momento cu sinta y hiba dialogo riba e asunto aki, ta na su luga pa pidi gobierno pa cambia cierto leynan di impuesto pa no pone pensionadonan yuda den e mercado laboral pero despues ta suta e hendenan aki cu impuesto sin misericordia.
En berdad tin ley cu ta hinca un pensionado den un tipo di bracket diferente pa e forma con nan tin cu paga impuesto pero berdad di e situacion actual ta cu tin mester di hende pa traha of tin cu habri porta y permiti stranheronan bin ocupa e vacaturanan aki, cu lo trece problemanan totalmente diferente cu si permiti pensionadonan yuda den e sector hotelero.
Mester inicia c’un dialogo mas rapido posibel caminda tur instancia envolvi lo tin cu sinta y analisa e situacion cu tin na e momentonan aki riba e mercado laboral y mesora analisa e posibilidad di permiti pensionadonan bolbe bay traha y asina alivia e situacion cu tin na e momentonan aki.