Indeksashon segun lei ta otro for di oumento
Nos ta selebrá 65 aña di introdukshon di AOV i den luna di grandinan i den porta di promé di òktober Dia Internashonal di Grandinan. Nos grandinan ta warda pa sá ki dia ta bai indeksá nan penshun di behes(AOV) segun lei, unda ta basa bon klá ku AOV ta keda indeksá segun kresementu real di ekonomia.
Gobièrnu a anunsiá den un karta nan Parlamento riba e rapòrt di IMF di lo bin ku un dialogo nashonal pa ku kon ta bai atendé ku ku AOV den futuro i kon ta bai oumentá esaki, un dialogo ku nos di MAN-PIN ta sostené i lo partisipá. Pero loke sí MAN-PIN i nos grandinan no ta aseptá ta ku hiba indeksáshon den un dialogo nashonal. Pa nos e derechi di penshonado no mester dialogá riba dje pa rèk esaki manera kakiña.
Hecho ta ku e lei aktual ta duna derechi pa tur esnan ku ta kobra AOV i ku gobièrnu a keda sin kumpli kunan, violando e lei di AOV, apesar ku tin un kresementu real di ekonomia, manera lei ta indiká. Pa esun ku tin derechi riba AOV for di 2021, e debe entretantu a akumulá na mas ku 5.000 florin. Frakshon di MAN-PIN ta lamentá ku no a hasi menshon di esaki i ta nos grandinan, kobradónan di penshun behes ta sufri tur dia ku e preisnan haltu den supermerkado.
Gobièrnu tin alredor di 40 Mion florin na debe na nos grandinan. Pregunta na Minister America-Francisca ku ta responsabel pa kumpli ku e lei aki ta, ki dia e indeksashon ta wòrdu pagá nos grandinan?
Pa e motibu aki nos ta indiká Gobièrnu pa e parti di indeksashon di penshun behes no forma parti di ningun dialogo nashonal paso ta derechi di kada penshonado segun lei. Den mesun rosea nos ta pidi un reunion públiko ku e Minister di SOAW, sra. America – Francisca pa den Parlamento nos debate riba pago di indeksashon di penshun di behes (AOV) di nos grandinan.