A pasa cuater luna y Prome Minister Mike Eman ainda no a duna ningun contesta riba e cambionan proponi pa incorpora e Instituto di Ombudsman den nos Constitucion. For di 26 di februari 2026, a solicita su opinion oficial (zienswijze) riba e cambionan constitucional y e cambio di ley di Ombudsman. E Ombudsman mes a entrega su reaccion for di 10 di april caba. Eman no. E retraso aki ta causa un tardansa innecesario den un proceso cu ya tabata avansa bon.
Incorporacion di e Ombudsman den Constitucion di Aruba
Conforme e conseho di Raad van Advies, ancra e Instituto di Ombudsman den nos Constitucion como un organo halto di Estado ta un desaroyo positivo y importante. Esaki lo duna e institucion e claridad constitucional y e independencia structural cu e mester pa cumpli cu su dos tareanan principal: (1) proteha e ciudadano contra mal gobernacion y (2) contribui activamente na e proteccion di su derechonan fundamental.
E Ombudsman ta apoya e idea pa reconoce e instituto como un instancia independiente, na mesun nivel cu Raad van Advies y Algemene Rekenkamer. Na Hulanda, Curaçao y Sint Maarten e instituto tin su base constitucional caba. Pa Aruba, specialmente e modelo di Curaçao por sirbi como punto di referencia, y nos leynan actual a tene cuenta cu esaki caba.
E propuesta ta cuadra cu e standardnan internacional, incluyendo e Venice Principles, cu ta enfatisa e importancia di independencia real, transparencia den e procedimiento di nombramento, un base legal cla y e recursonan necesario pa opera. E Ombudsman ta considera cu e definicion constitucional mester keda general, enfoca riba promove bon gobernacion y investiga conducta di organonan di gobierno, lagando e detayenan tocante poder y organisacion den un landsverordening.
Tocante e procedura pa nombra e Ombudsman, e ta mira e exigencia di un mayoria di dos tercio den Staten como un instrumento cu por fortalece e cooperacion, independencia y confiansa den e funcion. Sinembargo, e ta adverti cu un drempel asina halto por frena e proceso si no yega na un acuerdo rapidamente, coriendo e riesgo cu e vacatura ta keda habri pa demasiado tempo.
Restraso den e proceso
Parlamentario Vrolijk a enfatisa cu e falta di reaccion di Prome Minister ta causa un tardansa innecesario y cu esaki ta lanta preguntanan serio tocante e compromiso di e Gobierno di AVP-Futuro cu e fortalecemento di nos institucionnan democratico. Pa e rason aki, e siman aki lo wordo manda un segundo rappel na Prome Minister pa asina haya su opinion.
Ultimo fase di e proceso
Unabes ricibi e opinion di Prome Minister Eman, Parlamentario Vrolijk lo present’e mesora na Parlamento pa e miembronan studi’e. E paso siguiente ta pa bay Comision Central pa evalua si tin e sosten minimo di 14 miembro necesario pa sigui.
Si e drempel di 14 voto no ta alcansabel, e proceso lo para ey. Pero si e sosten ta ey, lo manda e ley un biaha mas pa Raad van Advies hunto cu e cambionan structural na e ley nacional.
Vrolijk a conclui cu e ta spera e opinion di Prome Minister pronto pa asina e proceso por sigui y Parlamento por tuma su decision.