Husticia pa nos criadornan
Ta basta cu hortamento di bestia
Recentemente a sodose un incidente cu a lanta preocupacion den nos comunidad, caminda un propietario di cunucu a sorprende personanan cu, segun informacion disponibel, tabata presuntamente involucra den intento di robo di un animal for di su tereno. Tambe a tuma nota cu gran preocupacion cu den e caso ey e criador di bestia a keda detene debi na maltrato di e ladron di bestia.
E acontecimento aki a genera amplio reaccion den sector agricola y entre criadornan di bestia, cu ta manifesta nan inquietud creciente tocante e sintimento di inseguridad den areanan rural y e percepcion cu proteccion di nan propiedad no semper ta efectivo.
Parlamentario pa fraccion di MFK den Parlamento di Corsou, sr. Juniël Carolina, ta duna un mensahe cla na tur agricultor y criador di bestia na Corsou: “bo preocupacion ta legitimo y bo bos ta wordo scucha den Parlamento”.
Den e mesun rosea sr. Carolina ta enfatisa cu ta rechasa tur forma di violencia. Sr. Carolina ta mustra cu tur asunto mester wordo trata den cuadro di ley y husticia. Sinembargo, sr. Carolina ta demostra comprension pa e frustracion cu hopi criador ta senti ora nan ta mira cu e fruta di nan trabou duro, sacrificio y inversion ta wordo afecta repetidamente pa ladronnan di bestia y vandalismo na nan propiedadnan.
Haciendo uso di articulo 96A di Reglamento di Ordo di Parlamento, sr. Carolina den un carta na Presidente di Parlamento di Corsou, ta haci e peticion pa un ora di pregunta, cu un serie di pregunta skerpi na Minister di Husticia. E preguntanan ta enfoca riba e magnitud real di e problema, e cantidad di caso registra, e castigonan cu ta wordo impone, e medidanan di prevencion disponibel y e capasidad pa fortalece patruyahe y control den areanan rural y camindanan cu ladronisacion di bestia ta frecuente.
Sr. Carolina kier sa tambe si gobierno ta dispuesto pa evalua medidanan moderno manera registracion mas amplio y identificacion di bestianan pa medio di chip of otro sistema cu por yuda proteha propietarionan y facilita investigacionnan.
Hortamento di bestia no ta solamente un delito contra propiedad. E ta tambe un ataque riba e medio di subsistencia di famianan cu ta depende di cria bestia y trabou agricola pa mantene nan mes. P’esey gobierno mester tuma e problema aki cu e seriedad cu e merece, asina sr. Carolina ta declara. “MFK no ta bay laga e sector agricola su lucha keda sin atencion. Nos lo sigui insisti riba medidanan concreto pa aumenta seguridad, fortalece control y garantisa cu agricultor y criador di bestia por senti nan mes mas proteha,” asina parlamentario Juniël Carolina ta mustra.
“Ora ladron ta perde miedo, hende honesto ta perde confianza; p’esey ley mester proteha esnan cu ta traha.”, asina sr. Carolina ta finalisa.