Politica

Parlamentario Shailiny Tromp-Lee cu un reflexion relaciona cu Dia di Betico 2020


ORANJESTAD,Aruba

Mañan ta Dia di Betico y sigur esaki ta un dia pa nos tur na e isla aki reflexiona riba e significacion di e dia aki. E logronan cu a conduci na e dia nacional di fiesta aki. Ya ta hopi decada a pasa cu nos tin Status Aparte, un logro sin igual di Betico y e lucha visionario di nos grandinan pa logra autonomia di nos pueblo y pa nos pueblo.  Prome cu e logro aki, Aruba no tabata baas den su propio cas, un pais cu tabata bou mando di un Gobierno Central domina pa un otro isla, den un Reino Hulandes domina pa Hulanda, unda e deseo di e Arubiano hopi biaha no tabata ser considera mes. Imagina bo cu bo tin di pidi un lessenaar pa bo tin di haci bo trabou y bo peticion mester pasa 5 of 6 hefe na otro lugar, cu no ta ni preocupa cu bo necesidad. Ta e deseo ferviente ey, pa por regla nos mes bienestar y tambe ta responsabel pa nos propio destino, cu tabata e forsa tras di e lucha cu a culmina na 1986 bou liderato di Betico Croes d.f.m.

E tempo ey, a haci mofa di e causa. Un Aruba soberano tabata escandaloso pa hopi pero e vision, perseverancia y determinacion cu a conduci na inventa un areglo cu nunca antes a tende di dje (Status Aparte) y cu a resulta positivo y exitoso pa nos pais. Sigur atrabes di tempo nos Status Aparte a demostra su balor y nos por constata cu hasta a keda copia den Reino, unda Hulanda mes a propone e status aki pa otro islanan den Reino.

Awe ora abo ta usa e florin Arubano di nos propio Banco Central, awe ora bo ta gosa di nos airport y industria di turismo, awe ora abo tambe ta gosa di e frutonan di por dicidi den nos propio cas, unda nos mes ta baas y tin nos propio Parlamento y Gobierno, esey ta e logro di e causa cu Betico a lidera y realisa.

Soberania di Aruba a absorba Betico y el a dedica practicamente henter su bida, te na e punto di entrega su bida pa e causa. P’esey ta mas cu husto reconoce su logronan riba su fecha natalicio. E union cu el a logra den nos pueblo tras di e causa sagrado mester sirbi nos como guia pa hiba nos pais awor na e siguiente nivel. Nos mester percura pa gara e bandera y percura pa Aruba haya su Independencia financiero bek, percura semper pa independencia di forsa aheno y realisa un pais stabiel, husto y cu igualdad social y prosperidad duradero.

Awe caba e celebracion ta start cu e Manifestacion Cultural riba Plaza Betico cu ta cuminsa di 6:30 pm. Y mañan tambe riba Plaza Betico tin e Ceremonia Protocolar cu lo cuminsa pa 9:00 am. Alabes  rond Aruba lo tin diferente actividad pa nos celebra e dia aki en grande. Tur nos museonan lo ta habri, tin organisacion cu tin weganan popular, Expo/Manifestacion cultural y feria na rotonde na Santa Cruz etc. 

Ban hunto celebra su bida, ban hunto demostra con orguyoso y agradecido nos ta di su lucha y logronan. Danki na dje! Feliz Dia di Betico!


Related posts

Prome Minister Evelyn Wever-Croes: Riba e tema di Cambio Climatico Prome Minister a duna discurso den e cumbre di universidad di aruba

EA News Author

Fin di siman ta cera cu 133 caso di covid-19

EA News Author

Ciere di frontera cu venezuela ta wordo prolonga cu 6 siman

EA News Author

Leave a Comment