E Parlamento Sentro-amerikano (PARLACEN) a hasi resientemente un poderoso Deklarashon di Solidaridat pa Bonaire, presentá pa Miembro di Parlamento di Repúblika Dominikana, Hon. Catalina Olea Salazar,
PARLACEN, e parlamento regional di Sentro-amérika i Karibe, ta uni representantenan elegí di su paisnan miembro — Belize, Costa Rica, República Dominikana, El Salvador, Guatemala, Honduras, Nicaragua i Panamá — I tambe ku paisnan asosiá manera Argentina, México, Chile i Colombia, pa promove koperashon polítiko, derechonan humano i desaroyo regional.
E apoyo i solidaridat di paisnan di Sentro-, Suramérika i Karibe pa pone Bonaire bek riba e listra di Teritorionan Sin Propio Gobernashon di e Nashonan Uni ta enfatisá e nesesidat urgente pa protehá identidad, idioma i herensia kultural di Boneiru. Desde 2010, ora Bonaire a wordu hinka den Konstitushon Hulandes sin konsenso di e pueblo, e proporshon di Boneriano nativo a baha for di 80% pa 30% awendia, reflektando impaktonan demográfiko i kultural serio.
E deklarashon akí ta uni ku otro akshonnan resiente, inkluso di Parlasur — Parlamento di e blok Mercosur di Suramérika, ku su miembronan ta Argentina, Brasil, Paraguay, Uruguay i Venezuela, i paisnan asosiá manera Bolivia, Chile, Colombia, Ecuador, Guyana, Peru i Surinam — den Desèmber 2024. Esaki ta reflektá e esfuersonan kontinuo di James Finies i e Bonaire Human Rights pa defende e derechonan di pueblo Boneriano.
E deklarashon pa Bonaire na siudat di Guatemala durante e asamblea plenario di PARLACEN ta resalta ku dignidat humano i autodeterminashon ta derechonan univérsal, i no asuntonan interno di potensianan kolonial. E ta hasi un yamada riba gobiernonan i parlamentonan di Latinoamérika i Karibe pa tuma un posishon firme kontra tur tipo di dominashon kolonial. Sostené Bonaire no ta solamente un akto di solidaridat — esaki ta un obligashon moral basa riba hustisia, demokrasia i dignidat humano.
“Nos ta gradisí Sra Olea Salazar i PARLACEN pa e paso importante akí,” según James Finies. “Re-list Bonaire na Nashonan Uni ta esensial pa protehá nos kultura, idioma i herensia, i pa enfrenta e retonan ku nos komunidat ta konfrontando.”
Despues di mas ku 965 dia luchando den eksterior, BHRO ta keda komprometé na traha huntu ku partnernan internashonal i regional pa protehá bienestar di pueblo Boneriano i preservá nan identidad kultural.
Press release: Bonaire Human Rights Organization