Partidonan na Aruba perhudica pa coronavirus COVID-19 awor por demanda

ORANJESTAD,Aruba

Ciudadanonan di Aruba, sea ta esnan cu a
keda contagia cu e coronavirus COVID-19, of familiarnan
afecta pa nan contagio, y doñonan di negoshi afecta pa e virus
aki, awor tin caminda di cana legalmente localmente y haci un
demanda pa recobra gastonan perdi a consecuencia di e
pandemia aki. Un fundacion cu e meta pa demanda na nomber
di e grupo menciona, Mega Corona Compensation Foundation
(“MCCF”), ta e demandante den un demanda colectivo a base
di art 3 : 305ª di nos Codigo Civil. Pa medio di e fundacion aki,
esnan afecta awor por demanda e partido responsabel segun e
fundacion, esta China, cu ta esun cu segun nan, a causa e
situacion dramatico aki y pa cual e fundacion menciona ta ten’e
responsabel. E fundacion a crea un portal (website) via cual
esnan afecta localmente, por registra y haya nan caso atendi.
Localmente e bufete di abogadonan Gabri de Hoogd y Diana
Emerencia ta representa e fundacion menciona.
E COMIENSO DI E VIRUS
Recientemente e progreso di e tipo nobo di e Coronavirus,
mihor conoci como COVID-19, a distrui mundo. Esaki (manera
a splica ) a causa y keto bai ta causando daño extremamente
serio. E virus a cuminsa progresa na Wuhan, Provincia di
Hubei, China na December 2019 y a plama rapido den Asia,
Europa, Estados Unidos di Merca, y Caribe, entre otro.
CHINA NEGLIGENTE
E fundacion ta sigui mustra cu China tabata negligente durante
e comienso di e virus na Wuhan, cual echo a contribui na e
severidad di nos realidad actual y demandante, MCCF, ta tene
China, e acusado, responsabel. China tabata sa cu COVID-19
ta peligroso y capas di causa un pandemia. Asina mes nan
(Republica Popular di China y su entidanan gubernamental
relevante) a actua lentamente, proverbialmente nan a ‘hinca
nan cabes den santo’, cu e intencion di proteha nan propio
interes economico y pa tene esaki intacto a costo di tercera
parti, incluyendo demandante y e Partidonan Lesiona.
DAÑO LO SIGUI MULTIPLICA
E actonan di China a haci daño na esnan cual interes cliente ta
defende y e daño lo solamente sigui multiplica den e dia- y
simannan benidero. E actonan di China a hiba (y lo sigui hiba)
na lesion personal y morto, y tambe na otro daño (economico).
CASONAN CONFIRMA
Desde 26 di April 2020, tin mundialmente mas cu 2.908.527
caso di virus confirma, (mas cu) 203.332 morto y un cifra
exponencialmente mas grandi di caso no diagnostica. Por
spera cu e cifranan aki lo sigui crece explosivamente den e
tempo benidero. Un catastrofe mundial ta tumando lugar.
LOCKDOWN
Pa motibo di e peliger creciente, e islanan di Caribe Hulandes a
stop tur vuelo di China, Merca, Europa y otro paisnan. Paisnan
Caribense mester a sera nan frontera, apesar cu nan economía
ta depende severamente di turista internacional. Nan mester a
haci esaki pa proteha nan pueblo. Bolsa di balor, incluyendo e
Bolsa di Balor di New York, a sufri e perdida mas severo desde
e recesion grandi di 2008.
FAYO DI CHINA
E fundacion ta sigui mustra cu China tabatin e deber di no
actua negligente contra pueblo y entidad legal di e islanan den
Caribe Hulandes, incluyendo e Partidonan Lesiona. China
absolutamente mester a proteha residente di otro paisnan y
alerta e otro paisnan, inluyendo Europa y e islanan di Caribe
Hulandes, di e severidad y realidad di e virus mortal aki. E
negligencia di China, cu a falta di divulga informacion crucial
tocante di COVID-19 na e resto di mundo, tabatin efecto
negativo tanto riba salud fisico, como tambe salud
economico/monetario/financiero di residente di Caribe
Hulandes. China pues, a viola su deber pa cu cliente y e
Partidonan Lesiona.
E BASE DI E CASO
E fundacion y e ‘Partidonan Lesiona’, manera ya menciona, ta
dirigi nan mes na China a base di un acto inhusto, y mas en
particular un omision desastroso. E acto inhusto por atribui na
China pa motibo di culpabilidad of pa motibo di un causa cu ta
cay pa su cuenta bou di ley of conforme e opinion comun.
Gobierno di Aruba so caba ta calcula un perdida economico
total den su hurisdicion di por lo menos Afl. 1.3 biyon, y e
cifranan di perdida di Curaçao y Sint Maarten lo ta comparabel.
Cliente ta reconoce e cifra(nan) aki y un parti menor ta referi na
e trahadonan di Aruba, Curaçao y Sint Maarten kende ta
sufriendo un daño di por lo menos Afl. 900 miyon.
RECUPERA SUMA
Mester recupera e suma enorme aki y ta e Plataforma di cliente
ta cana dilanti pa asina asisti e victimanan di COVID-19 den
Caribe Hulandes.
ESNAN INTERESA
Den caso cu bo ta interesa di uni cu e fundacion Mega Corona
Compensation Foundation, y si bo ta comparti su principionan,
nos ta cordialmente pidi bo atencion pa e website
www.megacoronacompensation.org