Partnernan di kadena ta haña rekorido den Family Justice Center

Partnernan di kadena for di dunamentu di ayudo,
kuido, enseñanza i hustisia a haña un rekorido den e edifisio di Family Justice Center
(FJC). Durante e inspekshon nan a haña un aktualisashon tokante progreso di e
konstrukshon i un splikashon tokante e funshonnan ku e sentro nobo ta bai brinda.
For di plan te na realidat
Na aña 2023 a ranka sali ku konstrukshon di FJC. Pa e proyekto akí ta renobá e edifisio
eksistente di Sentro di Bario Antriol Pabou na Kaya Gatu. Fundashon Cas Boneriano, riba
enkargo di Entidat Públiko Boneiru, ta enkargá ku ehekushon di e trabounan, ku
aktualmente ta den pleno marcha. FJC ta bai pone un standart nobo pa loke ta trata
dunamentu di ayudo: víktimanan di violensia doméstiko i maltrato di mucha di awor en
adelante tin ku konta nan storia un biaha so pa risibí e sosten nesesario. E aserkamentu
akí ta garantisá ku ta duna ayudo na un manera seif i efisiente na adultonan, hóbennan i
muchanan ku tin di haber ku esaki.
Un bista padilanti i planifikashon
Ta premirá ku e edifisio den su forma básiko lo ta kla den e di dos kuartal di aña 2025.
Despues di e fase akí ta sigui e sobrá dekorashon, tantu paden komo pafó, promé ku e
Punto di Notifikashon i Konseho pa Violensia Doméstiko i Maltrato di Mucha (Guiami) i e
Kas pa Kuido i Siguridat por tuma e sentro den uso. E empleadonan di e Punto di
Notifikashon i Konseho pa Violensia Doméstiko i Maltrato di Mucha (Guiami) i e Kas pa
Kuido i Siguridat lo bai traha den forma vast einan, di manera ku por brinda ayudo integral
i direkto na un solo ubikashon. FJC ta para símbolo pa e kolaborashon entre
profeshonalnan for di vários disiplina, ku konhuntamente tin komo aspirashon pa yega na
sosten i ayudo optimal pa tur hende ku tin di haber ku violensia doméstiko i maltrato di
mucha.