Si e gay di galinja no canta mainta , toch dia ta habri y solo ta sali.
Si bo wekker of alarma di telefon no zona pa bo lanta, toch bo ta lanta for di sonjo.
Tin hopi cos cu hende ta depende riba dje y nan ta lubida cu Dios tin poder riba tur cos.
No pone bo confiansa den locual hende ta haci of hende por haci , y ora un tardansa sosode, cuminsa murmura y papia malo di hende, of circumstancia pasobra tur cos ta depende di Dios y no di hende.
Hopi biaha hende ta den un situacion cu nan kier sali , pero nan no ta sali mientras tanto nan no renoba nan mente y stop di papia malo y cuminsa gradici Dios.
Ora algo sosode semper busca manera pa bo sa, ta con cos por a cambia, ta con bo a yega eynan, samina bo mes, y wak cuanto oportunidad bo a hanja den bida y bo a neglisha y no tira falta riba ningun hende.
No complace cu hende y lubida riba Dios, pasobra hende ta dushi cu bo, of contento bo cu mientras cu bo tin y cos ta sali bon na nan fabor, pero despues nan ta lubida riba bo.
Ora ta temporada di shimaruco tur hende sa na unda e palu ta , pero ora e temporada pasa nan ta lubida riba e palo.
Cana cu Dios diariamente, no wak bo circumstancia, pero sabi cu Dios ta capas pa yuda bo, y libra bo for di locual bo ta den , sea ta trampa di enemigo, of ta bo mes boca, of ta bo mes capricho, of cabes duro, of bo mal actitud, riba tur cos Dios , tin control, y si bo para keto y arepenti, bo yudansa lo yega sigur y na tempo pasobra Dios no ta lubida.
No pone placa dilanti di Dios, corda cu tur locual cu bo tin of bo ta bay ricibi, sin Dios bo no por haci nada, corda riba bo salud , corda pone tempo pa Senjor, pasobra ki bal un hende tin tur cos y e perde su alma.
Ki bal un hende tin tur cos y e no tin su salud, corda bon no complace hende y lubida riba Dios, pasobra tur amistad y tur relacion ta pasahero, pero solamente den Cristo Hesus nos tin salbacion.
Mi carni y mi curason por faya, ma Dios ta e fortalesa di mi curason,y mi porcion pa semper. ( Salmo 73:26).
Lo Bo warda den pas perfecto, esun cu su pensamento ta permanece den Bo, pasobra e ta confia den Bo. Confia den Senjor ,pasobra den Dios e Senjor nos tin un Baranca eterno.(Isaias 26:3-4).
Senjor ta mi fortalesa y mi escudo, mi curason ta confia den dj’E, y mi ta wordo yuda,pesey mi curason ta regosiha,y cu mi cantica lo mi alab’E.
Pablo a duna un bon splicacion con hende mester sa di biba, e a bisa den Filipensenan 4 . Mi a sinja di ta contento den ki situacion cu mi hanja mi aden.
Mi sa di biba humilde, y mi sa di biba den prosperidad,mi a sinja e secreto di ta barica yen y di pasa hamber, tanto di tin abundancia como di pasa necesidad.
Tur cos mi por den Cristo , Kende ta dunami fortalesa.
Esey ta nifica cu ora bo tin hamber, keda trankil, y ora bo tin abundancia, no sali grita riba caya, ora bo no tin, bo ta busca Dios, pero ora bo hanja tambe, keda sirbi Dios cu un curason fiel, ferviente.
Pastor Marcel Balootje.