Cuater palabra cu ta hisa nivel di nos norma y balor, nos crisis social no a cuminsa riba caya, e a cuminsa den hogar nan caminda pa un of otro motibo, mayornan a pone un banda un di 4 palabranan aki, of den caso extremo tur a wordo pone un banda.
Awor nos tin cu sa e berdad cu ningun di e 4 palabranan aki no tin mester di placa pa pone nan bek na nan lugar, den nos hogar.
Pasobra ta un custumber pa laga respet bay for di man y bira iresponsabel y despues combine cu falta di trabao y hasta hinca politica den e asunto , cual ta nos responsabilidad como mayor.
Bo no tin mester di placa pa coregi ni tampoco guia un mucha riba e bon caminda, educacion no ta nifica cu bo tin cu cumpra tur cos cu bini na moda pa bo yiu, pero educacion ta nifica , siña bo yiu balora tur cos cu por bo dune.
E mihor manera pa siña un mucha respeta , ta di lage mira e respet cu boso como mayor tin un pa otro anto asina e sinti cu esey ta algo di balor y cual mester wordo imita.
Actitud y vocabulario den cas, ta manera salu y sucu den tur cos nan ta envolvi, nan ta guia y nan ta yuda forma bon karakter y integridad den cada persona.
E palabra integridad ta nifica rectitud , cual ta e definicion di cana den husticia y haci cosnan corecto.
Fieldad na Dios ta hiba nos na integridad, tanto na hende como na Dios, un di e parti nan importante ta nos fieldad un na otro, especialmente den matrimonio y famia.
Como homber / muher bo tin un famia, bo tin un compromiso serio den cual bo mester dirigi den bon caminda locual Dios a confiabo cune.
Ta imposibel pa bo ta infiel na tera y fiel na cielo, ta imposibel pa bo ta iresponsabel cu bo famia na tera y bo ta bon cu Dios na cielo, ta imposibel menosprecia hende y aprecia Dios.
Ta imposibel biba malo cu bo prohimo / famia y stima Dios alabes , ( 1 Juan capitulo 3 vers 14 +15).
Proverbionan Capitulo 19 vers 1 ta bisa : Mihor un hende pober cu ta cana den su integridad cu un hende cu tin boca perverso y ta bobo tambe.
Proverbionan Capitulo 11 vers 3 ta bisa: Integridad di e rectonan lo guia nan, ma perversidad di e traidonan lo destrruinan.
Aki nan como mayor bo mester realisa cuanto balor educacion di bo yiu y guia den caminda di Señor ta nifica pa comunidad.
Salmo Capitulo 26 vers 11 ta bisa; Ma pa loke ta ami , lo mi cana den mi integridad, redimimi y tene misericordia dimi.
Nos mester di Dios den nos integridad, e no ta bay pa bo estudio, ni tampoco bo posicion, pero mas temor y respet bo tin pa Dios , mas alto bo integridad lo yega. ( Job Capitulo 1 vers 1) (Salmo Capitulo 1 vers 1)
Salmo capitulo 28 vers 18 ta bisa: Esun cu cana den rectitud ( integridad) lo wordo salba, ma esun cu ta perverso den su camindanan lo cay diripiente.
Confiansa den Dios, Fieldad , Respet ,Responsabilidad y Integridad, ta base pa nos norma y balor bin bek na su lugar, caminda nos lo mira menos divorcio, menos mucha den prison, y menos hende grandi den depression.