Ta sumamente necesario pa publica e berdad pa ningun hende no bisa mayan cu Dios kier, nan no tabata sa:
Ora un hende ta bon na altura, cu ta malo e ta haci, e ta 100% bon na su conocemento, e sa e daño cu e ta haci na su prohimo, of na famia, of na comunidad, y e no kier stop, boluntariamente e ta persisti den maldad y mentira, un persona asina ta bira enemigo di Dios.
Ora hende ta materialista,y stima placa mas cu Dios,hende ta stima idolatria, bruheria, santeria,inmoralidad y perversidad nan ta bira enemigo di Dios.
Segun Galationan 5:19-21 un hende cu ta participa den e obranan di carni no por hereda e reino di Dios.
Un hende cu ta comete adulterio na su sano huicio, cu ta pone su famia den tur clase di peligro ta bira un enemigo di Dios.
Un hende cu ta murmura constantemente y cu ta mal agradeci, kende ta lubida for di unda Dios a saka e, y ta papia malo y no ta haci Boluntad di Dios, e persona ey ta bira un enemigo di Dios.
Tur esnan cu nenga Cristo Hesus como Señor y Salbador lo no hereda bida eterna, pasobra nan mes a scohe pa bira enemigo di Dios.
Juan 3:36 Ta recorda nos tur bisando: Esun cu kere den e Yiu tin bida eterno, ma esun cu no obedece e Yiu lo no mira bida, ma e furia di Dios ta keda riba dje.
Tur esnan cu ta haci bofon di Dios, di Su Palabra y di Su mandamentonan, tratando di haci cambio den e naturalesa den cual nan a wordo crea, ta haci nan mes enemigo di Dios.
Tur esnan cu ta apoya maldad y inmoralidad, sea pa placa, fama, politica, amistad cu scuridad etc, ta haci nan mes enemigo di Dios, pasobra nan sa bon cu ta malo nan ta haci.
Esnan cu ta sconde cosnan horta, sconde arma, bende arma, huur arma,y pa nan motibo crimen ta aumenta , hende ta wordo menasa, esnan cu ta bende of apoya uso droga, y cu tin e conocemento cu ta yiu di hende nan ta destrui, ta haci nan mes enemigo di Dios.
Ningun hende por sirbi dos shon, sea e ta stima un y odia otro, of e ta leal na un y despresia e otro.
E wega di ta mitar cu Dios y mitar den idolatria, of mitar cu Dios y mitar den mundo, no por sigi, tur hende sa cu bo mester scohe, sea pa Dios of pa scuridad, pero bo no por cana den dos caminda.
Den Romanonan Capitulo 1: 18-32 Dios ta splica bon cla, kico lo pasa cu esnan cu ta ninga di reconoce Dios su autoridad y su poder, hende nan cu kier biba manera nan kier y no tin temor di Dios.
Nos ta bibando den un tempo caminda hende a bira sinberguensa, y nan no kier bandona pica, ni tampoco arepenti, nan ta haci tur forma pa sigi biba den inmoralidad y den maldad, serando nan horea pa e berdad, nan ta prefera kere den fabula.
Pesey nos ta mira nos hobennan ta demostra cierto mal conducta, cu ta trece dolor pa hende cu ta biba den nan sano huicio.Pero e hobennan no por demostra nada bon, si nan mayornan no ta para den e berdad. Pasobra sin e berdad di Señor ta dificil pa lanta un hoben den bon caminda.
Laga nos para un rato keto, pasobra enemigonan di Dios lo no drenta cielo,si nan no arepenti.
No busca enemistad cu Dios.