Recientemente a tuma luga un encuentro entre e docentenan di E.P.B. cu Consortium
Beroepsonderwijs di Hulanda. Consortium Beroepsonderwijs ta un compania cu ta conecta
profesionalnan den enseñansa y ta desaroya conhuntamente material educacional y
examennan valido.
Den e siman di 20 te cu 27 di Januari, 2025 meneer Marcel Polman y meneer Ruben Muller
di Consortium BO a bini di Hulanda pa duna e docentenan di E.P.B. trainingnan cu tin di haber cu examen. Desde aña escolar 2022-2023 scolnan di E.P.B. a cuminsa cu e sistema nobo A.B.O. cu ta para pa Arubaanse Beroepsonderwijs. Esaki a trece cu ne inovacionnan significativo pa loke ta trata e parti di examen. Pa por eleva e nivel di examina y evalua examen, Consortium BO a duna e docentenan di E.P.B. diferente curso.
Un di cursonan aki tabata specialmente dirigi riba e docentenan cu ta examinado caba. E meta di e curso aki tabata pa mehora profesionalisacion di nan habilidadnan. Meneer Ruben Muller a enfoca riba reflexion propio di cada docente. E punto principal ta pa e docente ta un examinado imparcial y profesional teniendo cuenta cu tur rekisito di evaluacion.
Pa garantisa desaroyo continuo den profesionalisacion di docente a duna un curso tambe cu a yama “Train-de-trainer”. Esaki a keda na e encargo di Meneer Marcel Polman. E curso aki tabata specificamente pa e docentenan cu den futuro lo por duna e curso pa e examinadonan. No solamente meneer Polman a enfoca riba reflexion propio di cada docente pero tambe a duna hopi herment di con por duna e training efectivamente den futuro. E meta ta pa finalmente e docente cu ta un examinado por haci un evaluacion imparcial y legitimo.
Pa completa tur e facetanan di examen meneer Marcel Polman a duna e team di comision di examen y comision central di examen tambe un curso. E curso aki tabata tin como meta pa mehora conocemento y proceso di examen. Un di e puntonan cu a resalta durante e training aki tabata enfoca riba mehoracion di e canalnan di comunicacion y colaboracion entre e diferente comisionnan di examen. Sinembargo e enfoke principal tabata dirigi riba e mehoracion di e contenido y proceso di examen.
Por mira bek riba un siman satisfactorio unda e docentenan di E.P.B. a engrandece nan conocemento intelectual y personal. Tur esaki lo yuda eleva e nivel di e evaluacion di examen y tambe e validez di e examennan cu na final lo ta na beneficio di cada alumno.
