Un delegashon di piskadonan di Wèstpunt ku ta gana nan pan di kada dia den e sektor di peska, a bin Parlamento pa entregá Presidente di Parlamento, señora Charetti America-Francisca, un karta ku petishon. E piskadónan tin vários dia ta bosiferá nan inkietut i preokupashon den medionan di komunikashon lokal pa e echo ku nan ta konfrontá peliger na e lugá di piska na kosta nòrt, den e área di Wakawa. T’asina ku Marina Ulandes ta hasiendo uso di e tereno na Wacao pa ehersisionan di tiru. E piskadónan ta reklamando ku nan ta eksperensia peliger ehersiendo nan labor dor di tirunan ku projektilnan balistiko. Esaki ta forma un menasa pa nan bida. Koperativa Uní di Peska a pidi atenshon di Marina Real Hulandes pa respetá nan derecho di libertat di moveshon i pa Marina mantené su mes na nos leinan di medio ambiente. E piskadonan ta pidi atenshon urgente di Gobièrnu i Parlamento pa e fenomeno aki. Un karta ku petishon similar a bai tambe pa Gobièrnu di Kòrsou.
