E proceso pa desaroya, drecha y mehora e veldnan di futbol na Aruba, cu e meta di eleva nan calidad, a cuminsa ya algun tempo y ta sigui progresando. Awe por informa cu varios pole di luz, cu a keda warda pa un periodo largo na Colombia, finalmente a yega Aruba y ta cla pa wordo transporta pa diferente veldnan di futbol rond di nos isla.
E rehabilitacion di varios veldnan cu tabata den mal estado a cuminsa bou di e ministerio anterior di deporte. Den e etapa actual, e Gobierno ta sigui cu e proceso, y e actual Minister di Deporte, Gerlien Croes, a logra pa trece e pole nan Aruba, apesar di cu e proceso tabata dificil y complica pa nan por a yega Aruba e minister actual a logra.
Clubnan di futbol na diferente parti di e isla a ricibi e noticia cu satisfaccion. E Ministerio conhuntamente cu AVB lo tuma e decision tocante cual veldnan lo wordo priorisa, dando preferencia na e veldnan cu ta den renobacion y cu tin mas necesidad di iluminacion. Cu e instalacion di e pole di luz, mucha, hoben y adulto cu ta stima e deporte di futbol lo por uza e veldnan durante e dia, pero tambe den ora di anochi.
Na momento cu e pole di luz a yega Aruba, un di e companianan renombra di logistica , Fast Delivery, a encarga cu e transportacion y retiro di e material for Colombia pa Aruba y di waf di Aruba pa veld. E Gobierno di Aruba, e deportistanan y e comunidad en general ta contento cu e progreso aki. Poco poco, e proceso pa realisa veldnan di futbol di calidad den diferente bario rond di nos isla ta bira un realidad.