Partido Pueblo Orgulloso y Respetuoso (PPA) a organisa un encuentro informativo sumamente exitoso dirigi na e comerciantenan local, caminda e topico principal tabata un analisis profundo riba HOFA. E atardi/anochi aki a conta cu un tremendo asistencia di miembronan di gremio comercial y tambe cu presencia di lider di fraccion di Movimiento Electoral di Pueblo (MEP), kende a comparti informacion clave riba e materia aki.
Eduard Pieters, parlamentario y lider di fraccion di PPA, a expresa di ta hopi contento y satisfecho cu e resultadonan di e actividad, calificando e encuentro como uno “di kita sombre” pasobra a logra e obhetivo principal structuralmente.
“E meta principal di e anochi aki tabata pa duna informacion na nos comerciantenan y miembronan di gremio comercial. Nos a logra asina un sala basta yen, caminda e presentenan por a haya informacion valioso for di e perspectiva di fraccion di MEP y di nos mes como fraccion di PPA,” Pieters a splica.
Un dialogo profundo, critico y participativo
Segun e parlamentario a duna di conoce, e encuentro no a limita su mes na un presentacion unilateral, sino cu el a habri espacio pa un intercambio di ideas hopi dinamico. E comerciantenan presente a haci pregunta y cu hopi profundidad y sentido critico. Esaki a duna oportunidad na e lidernan politico pa contesta cada un di e interogacionnan aki debidamente.
Pieters a subraya cu e balor di e anochi aki no tabata djis pa informa, sino tambe pa scucha. A logra recauda hopi informacion di inquietud, preocupacion y, di un manera special, sugerencianan hopi importante for di e propio comerciantenan.
Tur e feedback aki ta duna nos mas tools y miho informacion pa dia di mañana, ora cu nos mester tuma un decision den Parlamento, nos por tuma esaki debidamente y bon informa,” e lider di PPA a enfatisa.
Na espera di e debate den Parlamento
E parlamentario a aclara cu e sesion di e anochi ey tabatin un caracter estrictamente informativo y no a duna luga na un debate politico ainda. El a splica cu e presentacion di e fraccionnan a wordo basa riba locual tin poni den ley y riba e informenan di Raad van Advies y Raad van State, cu e meta pa duna e pueblo y den e caso aki e comerciantenan informacion veridico cu ta kita e color politico for di e asuntonan aki.
Mescos asina, Pieters a señala cu nan ta keda na espera pa e reunionnan wordo yama den Parlamento di Aruba pa asina por hiba e debate formal structuralmente.
Pa conclui, e fraccion di PPA a mustra nan orguyo pa e paso aki y a extende un palabra di danki special na señor José Fernández Perla, kende a fungi como moderador di e anochi. Pieters a elogia su labor, cualificando e maneho como uno “sublime” y di un “tremendo profesionalismo” pa guia e anochi structuralmente bon.
Di igual manera, a gradici lider di fraccion di MEP pa a acepta e invitacion pa duna informacion for di nan banda, enfocando tambe riba e bista general di e topico, incluyendo e aspectonan di Raad van de Rechtshandhaving y CAft.
Tabata un anochi exitoso. Masha danki na e pueblo, masha danki na tur e comerciantenan cu tabata presente pa comparti nan conseho, sugerencia y inquietudnan cu nos,” Pieters a finalisa.
