Gibi Bacilio, outor di e kolekshon di poesia ‘Fièrnu selestial’ i Etienne Ys,
outor di e novela ‘De barmhartige staat – E estado miserikordioso’ ta presentá nan obra
riba djasabra 14 di desèmber di 19:00 or pa 22:00 or na Zòzò Ranch. E anochi akí e
outornan ta duna entrevista i nan ta lesa for di nan propio obra. Miéntras ku Bacilio ta
deklamá, e grupo Palabra Musikal ta kompañ’é. Bishitantenan por kumpra e buki di e dos
outornan i laga nan firm’é. Entrada na e presentashon di buki ta grátis. Bishitantenan por
registrá adelantá na 777 53 62 òf via un email na
eventsbibliotekapubliko@bonairegov.com.
‘De barmhartige staat’ ta e promé buki di Ys. Den pasado e tabata promé minister di Antia
Hulandes. Den e buki Ys ta trata temanan manera poder, identidat i influensia di
kolonialismo. Den e buki e ròlnan ta kontrali, e persona kolonisá awor ta e kolonisadó.
Den e kolekshon di poesia ‘Fièrnu selestial’, Bacilio ta trata tópikonan manera e lucha pa
emansipashon i e sanashon dentro di komunidat kurasoleño. E dos bukinan ta ideal komo
base pa un diskushon amplio tokante historia di nos islanan, emansipashon i herensia di
sklabitut.
Biblioteka Públiko Boneiru ta organisá e presentashon. ‘Ku e presentashon akí nos ta
spera ku mas lesadó ta bai lesa obra di Bacilio i Ys. Nos ta spera tambe ku e lesadónan ta
bai profundisá nan mes den e temanan ku e outornan ta trata, i ku nan ta drenta den
kòmbersashon ku otro hende tokante esakinan,’ asina Jennifer Pocornie-Martis, hefe di
biblioteka a deklará. Den futuro Pocornie-Martis ke organisá mas presentashon di buki
kaminda ta trata obra di eskritornan lokal i outornan di nos islanan ruman.
Miembronan di biblioteka por fia ‘Fièrnu selestial’ i ‘De barmhartige staat’ na biblioteka.
Presentashon di buki di poeta Gibi Bacilio i eskritor Etienne YS 14 di desèmber 2024 na Zòzò Ranch
