Presidente Donald Trump desde cu a huramenta como presidente di Merca ta haciendo cambionan drastico pa su Pais. Sinembargo hopi Pais rond mundo ta depende hopi di e mercado di productonan cu Merca ta ofrece, Aruba tambe ta un Pais cu ta importa producto for di Merca.
Combersando cu comerciante Hubert Dirks un di e comerciantenan cu mas impacto riba importacion di cuminda na Aruba ta duna di conoce cu hopi hende na Aruba ta kere cu loke cu ta pasando na Merca , Aruba lo no nota nada di dje, esaki ta un pensamento eroneo, Aruba lo bay nota hopi di e cambionan aki cu ta tumando luga na Merca.
Aruba ta importa hopi Merca y tur e productonan aki lo tin efecto pa Aruba riba e prijs di e productonan Mericano. Dicon Aruba ta importa hopi di Merca ta debi cu Aruba tin hopi turista Mericano y hotelnan na Aruba cu ta maneha door di Mericano y un di e exigencianan pa cu esaki ta cu nan kier nan productonan Mericano.
Aruba ta contrario cu Corsou debi cu na Corsou tin mas productonan Hulandes, Aruba tin hopi mas Mericano door cu Aruba tabatin e ex refineria cu tabata Mericano cu asina eproductonan cu a keda bin Aruba ta e productonan Mericano y asina e comunidad tambe a sigui uza y ta prefere e productonan aki cu ta bin for di Merca.
Mirando e movecionnan di presidente nobo di Merca ta indica cu e prijsnan di e productonan Mericano ta bay subi. Tin productonan di lechi y webo ya caba a subi desproporcionalmente halto. Hubert Dirks ta supone cu si e tarifanan aki sigui subi lo e impedi mas e producto di importacion na Merca cu e productonan interno Mericano eventualmente lo bay subi. Esaki ta pone cu automaticamente Aruba lo importa productonan hopi mas caro.
Sinembargo e solucionnan ta facil, solamente mester wak e productonan cu lo importa for di Merca y busca un reemplasante di productonan cu por reemplasa e productonan cu nos ta custumbra cu ne cu ta bin for di Merca. Sinembargo e proceso aki no ta facil segun comerciante Hubert Dirksz.
E mercado di Aruba ta dividi den dos , e mercado local cu ta e Arubianonan cu ta biba aki cu tin un custumber di compra, y e di dos ta e mercado hotelero y restaurant nan cu ta cuminda pa e turistanan y cu ta cumpra mas tanto e producto Mericano.
Sinembargo por busca otro alternativanan di producto, esey no ta e problema principal, pero e monopolio cu tin y cu ta basta grandi den e companianan di barco cu ta trece container. Mayoria di e productonan cu Aruba lo por haya for di otro Pais e producto no lo por yega Aruba den un lapso di tempo cortico, dus cu un barco por trece container semanalmente. E containernan di Merca pa Aruba ata dura tres dia y e otro paisnan alternativo ta dura tres siman.
Importante ta pa nos no para keto pero busca alternativanan pa e productonan Mericano y si no para keto un rato y mira e desaroyo y haci algo na dje, por mira cu productonan lo bay bira hopi caro den futuro.
E posicion cu Merca tin actualmente cu e menasa cu tin semper ta pone e ciudadanonan bira insigur y na momento cu tin insiguridad e prijs di tur cos ta subi pa busca garantia. Tambe por a tuma nota cu e tarifa mes no a wordo introduci pero e bolsa di balornan a cay, e situacionnan aki ta pasa abase di emocion. Hopi biaha hende ta bisa cu economia ta racional, pero loke cu nos ta siña ta cu economia no ta racional , pero emocional.
Na momento cu mester haya un mal noticia y un mal presentimento , lo kier cumpra hopi mas pa sinti safe. Esaki nan ta tipo di actitud nan cu por y ta pone prijsnan subi. Prijsnan di productonan Mericano a subi caba desproporcionalmente y cu tarifa of no tarifa prijs di productonan Mericano ta bay subi. E accion aki pa Aruba e ta un consecuencia basta halto debi cu Aruba ta importa hopi producto for di Merca y lamentablemente no tin un otro alternativa tampoco ainda.
Hubert Dirksz ta duna di conoce cu e ta hopi desapunto mirando cu na momento cu ta papia cu gobernantenan riba e situacionnan aki , lamentablemente yun di nan no ta haci nan mes preocupa y no ta duna un iniciativa di kier baha prijs di alimento na Aruba.
COMPRA ta busca masha hopi webo pa local y hotelnan na Aruba, pero actualmente e prijs di webo na Merca ta dos pa tres biaha mas caro cu Hulanda, pero na mes momento Aruba no tin un otro Pais alternativo cu por busca webo cerca dje.
Esaki ta conta pa Colombia tambe unda cu no tin alternativo, tin productonan cu ta Sali di Colombia nan ta bay te Merca y despensa ta yega Aruba , esaki ta full u buelta innecesario cu Aruba mester paga pa por logra haya e producto for di Colombia. Sinembargo Colombia ta hopi cerca di Aruba , pero e ruta alternativo entre Colombia –Aruba no tin. Mientras cu Aruba no ta haci e logistica , Aruba ta keda cu e problema.