Despues cu tur tramite necesario a keda cla, boluntario di Cruz Cora y un team logistico a cuminsa e prome mision di asistencia. Gobierno di Aruba a activa oficialmente su prome mision di asistencia humanitario pa Venezuela. Despues cu tur e preparacionnan logistico, tramite administrativo y coordinacion internacional a keda cla, e prome ekipo a sali diadomingo mainta rumbo na Venezuela pa brinda asistencia na e heridonan y comunidadnan cu a wordo afecta pa e fuerte temblor. Durante e ultimo dianan, Gobierno di Aruba a traha intensivamente hunto cu Crisis Management Office (CMO), Cruz Cora Aruba y diferente partner nacional y internacional pa haci posibel cu e mision por sali di un forma rapido y sigur. Prome Minister Mike Eman tabata presenta na Jet-TNCA FBO (Aeropuerto Internacional Reina Beatrix) pa bisa ayo y desea exito na tur e boluntarionan balente cu a bay Venezuela abordo e avion di Wardacosta di Caribe Hulandes.
Segun Prome Minister Mike Eman, e preparacionnan a concentra riba crea tur e condicionnan necesario pa cu e asistencia di Aruba por yega mesora na e luganan unda mas tin necesidad. “Nos a reuni cu CMO pa coordina tur e preparacionnan logistico cu mester wordo haci pa manda un ekipo di Aruba pa asisti Venezuela. Despues cu tur e tramite necesario a keda cla, nos prome ekipo a sali rumbo na Venezuela.”
E prome grupo ta consisti di 11 persona, incluyendo 9 boluntario di Cruz Cora y un team logistico di CMO di dos persona. Nan lo instala un hospital temporario y prepara tur e facilidadnan necesario pa ricibi e siguiente ekipo medico, cu lo yega den e dianan cu ta bin pa brinda cuido medico specialisa y realisa operacionnan. Mientras e hospital temporario ta wordo instala, e boluntario di Cruz Cora lo brinda prome asistencia medico na e heridonan. Gobierno di Aruba a coordina e mision cu Cruz Cora di Venezuela, Nacionna Uni, e Embahada di Reino den Venezuela y otro partner internacional pa garantisa cu e ekipo di Aruba por cuminsa su trabou mesora despues di yega. Siguridad di e boluntarionan y profesionalnan cu ta participa den e mision tabata un prioridad durante tur e preparacion. Prome cu e ekipo a sali, tur coordinacion y garantia necesario a wordo completa. Pa e transporte di e mision, Aruba a coordina cu diferente partner internacional. E Consul General di Merca a ofrece apoyo logistico pa transporte di ekipo medico, mientras cu tambe a wordo evalua e posibilidad di uza un avion di Marina Hulandes pa e siguiente ekipo cu lo sali.
Prome Minister Mike Eman a expresa cu Aruba ta sinti e tragedia cu a dal Venezuela hopi di cerca. “E reportahenan ta mustra hopi devastacion, hopi fayecido y hopi herido. Ta un situacion hopi dificil. Aruba tin un relacion special cu Venezuela y cu e comunidad Venezolano. Den momento dificil manera esaki, nos kier aporta y brinda yudansa unda cu nos por.”
