Promé yegada barku krusero Mardi Gras na Boneiru riba djárason 9 di ougùstùs

E ta un di e barkunan mas nobo i mas grandi di Carnival i e ta e promé barku merikano ku ta disponé di un sistema di kombustibel kompletamente riba LNG (gas líkido). Riba djárason 9 di ougùstùs e barku akí a mara pa promé biaha den haf di Boneiru.

E barku tin 6 área di tema i e ta brinda un variedat di eksperensia nobo riba tereno di kome, bebe i entretenamentu. E barku krusero akí tin asta un ‘roller coaster’ i e ta un di e barkunan ku ta ekipá ku suite den e kategoria di mas moderno, mas esklusivo i mas luho di Carnival. E barku ku ta nabegá bou di e nòmber Mardi Gras ta bou di komando di kapitan Guiseppe Giusa i ta ofresé lugá na mas òf ménos 6154 pasahero i mas òf ménos 1600 miembro di tripulashon.

Konforme tradishon diputado Jolinda Craane a dirigí algun palabra di bon biní i el a hasi entrega di bandera di Boneiru i a duna splikashon tokante esaki. Na nòmber di Tourism Corporation Bonaire Elesier Angel a entregá e buki di Boneiru ku ta ilustrá nos Parke Marino Boneiru i na nòmber di Armada Port Agency Byron Tromp a regalá un obra di arte lokal ku ta simbolisá e kasnan outéntiko di Boneiru. Ku e kaluroso bon biní akí nos ta spera ku e barku krusero Mardi Gras di e kompania di barku Carnival a disfrutá di su bishita na Boneiru. 

Potrèt di e momentu ku Mardi Gras ta drentando – Gunther Glanegin, kapitan di haf