Team profesional di HOH, LabHOH y Bloedbank na Expo Salud
Durante fin di siman, diferente profesionalnan den mundo di cuido a bin hunto como un solo team durante Expo Salud cu a tuma luga den Compleho Deportivo Betico Croes. E booth ‘One Team’ cu coleganan di HOH, LabHOH y Bloedbank tabatey presente pa asina brinda publico tur e informacion necesario for di biba saludabel, midi cholesterol, hiba bishitantenan den e mundo fascinante di laboratorio y alabes busca donante pa salba bida.
Bishitantenan di e booth One Team na e Expo por a haci entre otro test di colesterol pero alabes haya informacion di con un mashin di dialisis ta traha y cuanto ora pa dia y siman dialisa ta tuma. Un mashin cu ta filtra sanger cual ta un invencion tremendo pero alabes lamentabel ora un pashent yega asina leu cu e mester dialisa. Pues a duna informacion di e importancia di un bida saludabel pa no yega asina leu cu mester e tratamento di dialisis.
Rachel Kraaivanger, zorgmanager di departamento di dialisis a sigui splica cu ademas a duna informacion a medio di foyeto di e campaña conoci di HOH riba medionan social “smart cu carbs’.
Zoyenka Figaroa, analista na departamento di patologia, a splica cu e dia aki LabHOH a ofrece informacion riba kico ta pasa cu nan material organico y con nan ta traha cu esaki na LabHOH. Hasta a trece un microscop pe bishitante mes por mira con material ta mustra bou di microscop y kico tur por mira den e ‘plaatje’ cual ta hopi fascinante. Bishitantenan por a mira entre otro schimmel, tuberculosis y tambe paptest bou microscop. Fuera di esey LabHOH a bin cu potchi mustrando un galblaas yena cu piedra, e piedra mes y tambe un apendix y un tripa.
Ademas, e ta sigui informa cu aworaki LabHOH tambe ta ofrece e pashent e servicio di prik na cas. Si un persona ta ‘thuisliggend’ y no por sali for di cas pa cualkier motibo por yama LabHOH y nan ta pasa cerca e pashent gratis pa haci e testnan aki na cas mes.
Coordinador di Bloedbank, Fabian Werleman, a comenta cu pa medio di un sistema di registracion online esaki a resulta hopi bon durante e Expo tambe. Hopi hende tabatin pregunta tocante e proceso di dunamento di sanger y kico ta pasa cu e sanger despues di duna. E coleganan entusiasma a logra registra bastante persona cu awor lo cuminsa den nan proceso pa bira donante. Pa Bloedbank e dia aki sigur tabata hopi exitoso den recluta mas donante.
Director di Hospital, Jacco Vroegop, a comenta cu durante e Expo Salud e tres fundacion a para hunto como un solo team. Hunto nan a ofrece splicacion p’e personanan cu enfermedad cronico y mustra con importante ta pa cuida bo mes, sea bo curpa, bo cuido mental, pa move bon, etc.
Vroepop ta hopi orguyoso di a para hunto cu e team completo di HOH, LabHOH y Bloedbank di Hospital cu e dia aki a demonstra un bes mas nan profesionalismo y entusiasmo pa sali y duna unformacion y alabes reculta mas donante paso “Nos semper t’ey!”
