Entidad Publico Boneiro ta invita comunidad di Boneiro pa participa na e Conmemoracion di Abolicion di Sclavitud riba diaranson 1 di juli 2026. Durante e anochi aki, lo refleha riba un momento importante den historia, y lo duna homenahe na e forsa, dignidad y herencia di e hendenan cu a biba bou di e sistema di sclavitud.
E programa ta tuma luga di 17:30 pa 21:00 riba e luga di parker di Colegio Ehecutivo. E ta cuminsa 17:30 y ta dedica na conmemoracion y expresion cultural. Lo tin discursonan y momentonan di refleccion, sigui pa e ceremonia oficial di conmemoracion cu un minut di silencio y ponemento di krans. Banda di esey lo tin contribucionnan cultural. Pa medio di musica, arte, y palabra lo refleha riba e nificacion di libertad y con nos antepasadonan boneriano a lucha pa e libertad aki, y kico e impacto di esaki ta riba nos sociedad actual.
Ta pidi bishitantenan pa tene cuenta cu e reglanan vigente di trafico y parker. Por fabor staciona solamente den e areanan indica. Esaki ta necesario pa e conmemoracion por tuma luga na un manera seguro y ordena y pa evita cu ta blokia caminda y pasashinan.
Dia 1 di juli 2026, nos ta conclui un Luna di Emancipacion exitoso. Laga nos tuma e forsa cu tur e actividadnan cu a tuma luga durante Luna di Emancipacion a duna nos, pa huntu sigui construi un futuro briante y di igualdat. Entidad Publico Boneiro, huntu cu nos partner local Mangazina di Rei, ta invita tur habitante pa refleha riba e nificacion di libertad, igualdat y conexion y pa conmemora e dia importante aki huntu.
Luna di Emancipacion a bira posible cu sosten di Entidad Publico Boneiro, Ministerio di Ensenansa, Cultura y Ciencia y e Comision di Conmemoracion di Pasado di Sclavitud.
