Recherche di San Nicolas ta efectua cuater detencion den caso di tiramento

E departamento di recherche di San Nicolas a logra un avance significativo den e investigacion relata na e caso di tiramento cu a tuma luga diadomingo dia 21 di juni 2026, dilanti di Pacifico Restaurant. Den oranan di madruga di diabierna, autoridadnan a realisa cuater detencion den conexion cu e incidente aki.

E operativo policial, cu a conta cu sosten di e Team di Aresto (Arrestatieteam), e Unidad di K-9 y polisnan uniforma di districto di San Nicolas, a tuma luga den Caya St. Maarten. E accion ta parti di e investigacioninteresante cu recherche a bin ta eherce desde cu e suceso a tuma luga.

E incidente
E caso a cuminsa dia 21 di juni, ora cu alrededor di 3:55 di atardi, e central di polis a wordo alerta pa un tiramento na altura di Pacifico Restaurant. Segun informacion preliminar, e incidente lo envolvi dos vehiculo: un Nissan March color blauw y un Toyota Altezza color shinishi.

Na yegada di e patruyanan, e vehiculonan no tabata presente mas na e sitio. Sinembargo, durante e control, polisnan a encontra hulsnan di bala y señalnan di perforacion, kico a confirma cu a efectua tiramento. Poco despues di e suceso, polis a localisa e Toyota Altezza bandona den Caya Bonaire, cual a wordo confisca pa motibonan di investigacion.

Detencionnan
Danki na e trabou di investigacion di e departamento di recherche di San Nicolas, a logra detene tres sospechoso den oranan di madruga di diabierna. Ta trata di:

• D.R., di 27 aña, naci na Aruba;
• L.T.D., di 23 aña, naci na Aruba;
• K.R., di 18 aña, naci na Aruba.

Den transcurso di e dia, un cuarto sospechoso, identifica como M.P.Y. di 17 aña, a presenta boluntariamente na warda di polis di San Nicolas pa entrega su mes, despues di a wordo busca pa autoridadnan en conexion cu e mesun caso.

Apelacion na comunidad

Cuerpo Policial di Aruba tin compromiso cu siguridad den e barionan y ta haci un apelacion urgente na e comunidad. Tur persona cu tin informacion, of cu a presencia algo relata na e incidente aki, ta wordo pidi pa comunica cu e tiplijn di polis na 11141. E liña aki ta garantisa anonimidad total pa e informante.