E reinauguracion di e monumento dedica na memoria di piscadonan perdi ta wordo considera un iniciativa di gran balor y significado pa comunidad. E proyecto a cuminsa originalmente na 2013 como un iniciativa di Otmar Oduber, y a wordo retoma y completa aworaki danki na e compromiso di Minister Wendrick Cecilia, cu a lidera e proceso pa reinaugura e monumento.
E acto di reinauguracion no solamente ta marca un momento simbolico importante, pero tambe ta manda un mensahe di reconocemento y sosten pa tur famianan cu a perde un ser kerido riba lama. Danki na e reinauguracion, e famianan awor tin un luga digno unda nan por honra e memoria di nan sernan keri y haya un momento di consuelo y reflexion.
Lider di fraccion di PPA, parlamentario Eduard Pieters, tabata presente durante e evento y a expresa su aprecio pa e iniciativa. Segun Pieters, Gobierno di Aruba a mustra liderazgo y sensibilidad door di tuma e decision di reinaugura un monumento asina special. El a enfatisa cu e accion aki ta duna sosten emocional na famianan afecta y ta contribui na proceso di sanacion colectivo.
Pieters a conclui cu e reinauguracion ta un bunita y necesario iniciativa di Minister Wendrick Cecilia, cu ta reafirma e importancia di memoria, respeto y reconociemento pa e sacrificio di piscadonan perdi y nan famianan pero tambe na Otmar Oduber cu autor di e monumento historico aki cu ta significa hopi pa diferente famia cu a perde nan ser keri riba lama. .
