Featured Local

Reputacion di Contraloria General ta riba un linea negativo


Den fin di siman tras di lomba por a tuma nota den medionan di comunicacion un situacion hopi delicado unda cu Vice Presidente di Contraloria General Frederick Nuboer a keda hiba warda di Polis pa buracheria. Segun informacion adicional no ta prome biaha cu esaki ta sosode mirando cu e ta bebe hopi, e motibo no ta conoci dicon.

Den fin di siman ultimo por a tuma nota den medionan cu a cubri esaki cu Nuboer a haci hopi fastioso den un luga di come na Playa. Unidad di Polis a yega na e sitio y a atende cu Nuboer pero e tabata haci hopi dificil cu autoridad pa cual a dicidi di bay warda cu ne. Esaki sigur ta un situacion di preocupacion mirando cu Vice Presidente di Contraloria Genaral ta un puesto importante di hopi responsabilidad pa controla gobierno.

Cada un di nos cu tin un puesto asina renombra ta importante pa ta un ehempel pa comunidad y tambe un ehempel pa tur ambtenaar den gobierno. Cu e acto aki sigur Nuboer ta atacha e bon nomber y e confiansa cu pueblo mester tin den Contraloria General. No ta conoci con gobierno actual mes ta mira un situacion asina mirando cu integridad ta un punto fuerte den nan gobernacion.

No ta di awo ta cuestiona cu Nuboer su actonan ta pone e bon nomber di Contraloria General na peliger. For di aña 2016 Frederick Nuboer a wordo cuestiona pa su rol den Insel Air na unda cu e compania a bati bancarota lagando e trahadornan di Insel Air sin trabou y cu esaki a afecta tambe e caha di gobierno di Aruba door cu pa añas largo no tabata cumpli cu pago di prima. Nuboer tabata un ex inspector di belasting y pa e motibo aki hopi hende den comunidad y hasta parlamentarionan a cuestiona con ta posibel cu e por ta miembro di Contraloria General si ela perhudica caha di Aruba di e forma ey.

E tempo ey AVP tabata na mando unda cu Prome Minister Mike Eman no a para pa e pueblo di Aruba pero a acepta y permiti pa e acto inhusto pasa cu e trahadonan di Insel Air , pero tambe a permiti cu a manca e caha di gobierno.

E tempo ey parlamentarionan di MEP den opocicion a manda preguntanan oficial na Prome Minister Mike Eman via Presidente di Parlamento Mervin Wyatt Ras cu e preocupacion cu tabata reina mirando loke cu tabata pasa cu e trahadonan di Insel Air y con e bon nomber di Contraloria General ta wordo atacha.

Buracheria cu puesto clave den companianan y institutonan clave cu ta controla gobierno no ta cuadra cu otro. Frederick Nuboer tabata na cabes di Insel Air y a pone e compania keda sin cumpli mas di 2 aña cu nan debernan fiscal y a crea un problema grandi unda cu tur trahado a perde nan trabao. Awor aki hustamente e ex CEO di Insel Air ta forma parti di e colegio cu ta na cabes di Contraloria General unda cu e actonan den Insel Air ta papia hopi di loke Nuboer lo por representa den Contraloria General.

Frederick Nuboer ta un ex Inspector di Departamento di Belasting di Aruba unda cu lo mester a duna e miho ehempel p’asina tin e compania di Insel Air stabil , pero tambe percura pa Aruba haya su entrada husto. Sinembargo esaki no a sosode y a perhudica e caha di gobierno. Awor e ta Vice Presidente di Contraloria General unda cu mester controla gobierno, y no ta cuadra y no ta etico mirando e manera cu Nuboer ta ehecuta su trabao . No por ta asina un persona cu ta miembro di Contraloria General unda cu e mes ta permiti pa un compania bao di su mando keda sin cumpli cu leynan fiscal di pais Aruba unda cu a perhudica Aruba, caha di gobierno , pero tambe e pueblo di Aruba.

Awe un biaha mas ex inspector di belasting, ex CEO di Insel Air y actualmente Vice Presidente di Contraloria General ta haye den un situacion penoso. E biaha aki ta haye burachi, ta haci fastioso den un luga di come na Playa, ta keda deteni y hiba warda pa nan por atende cu ne. Esaki sigur no ta un bon ehempel y ta trece duda grandi den e puesto cu e tin mirando cu posiblemente lo e tin problema cu alcohol. Loke cu ta un realidad, cada persona cu ta traha cu gobierno y cu ta un ambtenaar no por tin problema cu alcohol, sea cu e por perde su trabao y of tin cu busca un tratamento.

Loke cu EA news por a compronde tambe for di aña 2016 cu a trece tur e puntonan pa Prome Minister e tempo ey Mike Eman y tambe Presidente di Parlamento e tempo ey Mervin Wyatt Ras. Pero te dia di awe no a duna cara y no a contesta Parlamento riba e irresponsabilidad aki. Esaki tambe ta ilustra y trece hopi duda di integridad di e ex prome mandatario Eman cu ya caba pueblo di Aruba a duna su straf.

Awor ta keda na Gobierno y na Parlamento di Aruba con nan ta mira e situacion aki. Sea ta duna un ayudo pa Nuboer por atende cu su situation di alcohol of dun’e su retiro pa evita cu ta sigi pone duda den bon nomber di Contraloria General.

Editorial

Potret : MasNoticia

Related posts

Minister Xiomara Maduro ta anuncia maneho di orario di tienda pa publico pa Dia di Betico

EA News Author

Luigi Faneyte a entrega retiro na Direktiva di Partido KUMUN

EA News Author

MEP A LANTA BANDERA MAS GRANDI NA ARUBA NA UN MANERA SPECIAL

EA News Author

1 comment

Reputacion di Contraloria General ta riba un linea negativo - Tur Notisia October 17, 2021 at 1:25 pm

[…] Source link […]

Reply

Leave a Comment