Wardakosta Karibe Hulandes ayera a ricibi un notificacion cu un catamaran a haña problema riba lama, y cu e tripulacion mester a bandona e boto inmediatamente. E Centro di Operacionnan Maritimo di Wardakosta mesora a dirigi e avion di patruyahe di Wardakosta pa e ubicacion specifica pa controla kico a sosode. Una bes cu a yega na e localidad, mas o menos 150 mia noordwest di Aruba, e tripulacion di e avion Dash a mira cu e personanan den lama tabata drif riba un asina yama ‘ life raft’, un tipo di vlot di rescate, pasobra nan catamaran tabata sink. E helicopter di Wardakosta ya tabata na caminda pa bay asisti e cuater homber nan.
Pa por a tene e ‘life raft’ na bista, cual tabata drif riba lama, e avion petrolero di Wardakosta a keda na e localidad pa monitoria e situacion. Na momento cu e helicopter a yega na e ‘life raft’ esaki a hisa y saca e cuater hòmber for di e ‘life raft’ y pone nan den e helicopter. E homber nan a yega Corsou save y nan a ser translada na inmigracion cu lo sigui atende e caso di e personan aki. Entretanto e Centro di Operacionnan
Maritimo di Wardakosta a manda un mensahe via di NAVTEX pa informa botonan den bisindario di e catamaran Second Wind cu a sink pa nan tene cuenta cu esaki riba lama.
