Lider di Partido Nashonal di Pueblo (PNP) di Corsou, Ruthmilda “Mimi” Larmonie-Cecilia, a yega Aruba pa participa na Congreso 2026 di Partido AVP, cu lo tuma luga diadomingo 4 di october na Aruba Marriott Resort Grand Ballroom.
Na Aeropuerto Internacional Reina Beatrix, Prome Minister y lider di AVP Mike Eman, Minister di Turismo, Transporte y Labor y futuro lider di AVP mr. Wendrick Cicilia y Parlamentario y Presidente di Directiva di AVP Clifford Heyliger a ricibi Ruthmilda Larmonie-Cecilia. Su presencia na Aruba ta coincidi cu un momento importante pa AVP. Durante Congreso 2026 lo tuma luga e relevo den liderazgo di partido, caminda lo instala mr. Wendrick Cicilia como lider di AVP.
Un historia comparti entre AVP y PNP
Durante e bonbini na aeropuerto, Mike Eman a para ampliamente keto na e lasonan historico entre AVP y PNP, dos partido cu tin un relacion cu ta bay bek diferente generacion.
Eman a referi na e periodo di Henny Eman, fundador di AVP, y Dr. Moises da Costa Gomez, fundado di Partido Nashonal di Pueblo y na nan rol den e lucha politico pa mas autonomia pa e islanan. Segun Eman, e colaboracion entre e lidernan di e tempo ey a contribui na pasonan importante den desaroyo constitucional di e Antias Hulandes y Aruba.
Eman a menciona entre otro e mocion di 1948 relaciona cu derecho di Aruba pa determina su posicion constitucional. Eman a recorda cu e documento tabata carga firma di C.A. (Shon A) Eman y sosten di Dr. Da Costa Gomez. Pa Eman, e historia aki ta ilustra cu e relacion entre AVP y Partido Nashonal no ta solamente uno entre dos organisacion politico, sino un relacion cu raiz profundo den desaroyo politico y constitucional di ambos isla.
Ademas di e historia constitucional, Eman a señala cu ambos partido ta comparti principionan cu pone atencion special riba esnan mas vulnerabel den comunidad. El a conecta esaki cu e ideologia cristian-democrata y cu e responsabilidad di politica pa duna un bos na esnan cu no semper ta haya un oido.
Mike Eman: relevo di generacion cu continuidad den principio
Prome Minister y lider saliente di AVP mr. Mike Eman a pone e bishita tambe den perspectiva di e momento cu AVP ta pasando aden. Segun Eman, Congreso 2026 ta representa un relevo di generacion, pero no un cambio den e principio y conviccionnan fundamental cu a guia partido.
Mientras AVP ta prepara pa instala Wendrick Cicilia como lider nobo, Eman a enfatisa cu e compromiso pa sirbi pais y specialmente esnan mas vulnerabel den comunidad mester sigui ocupa un luga central. E mesun principio aki, segun dje, ta algo cu AVP y Partido Nashonal di Pueblo ta comparti historicamente: duna bos na esnan cu hopi biaha no ta scucha y traha pa un comunidad caminda progreso y oportunidad ta yega na tur hende.
Eman a expresa tambe cu e ta sali for di su posicion como lider cu un bon sentimento, sabiendo cu tin personanan cu capacidad y compromiso pa sigui carga responsabilidad den partido.
Wendrick Cicilia: sigui reenforsa e lasonan
Minister y futuro lider di AVP mr. Wendrick Cicilia tambe a resalta e historia comparti entre AVP y PNP. Segun Cicilia, ambos partido a desempeña un rol importante den desaroyo di Aruba y Corsou y tin raiznan ideologico y pensamentonan cu durante hopi aña a acerca nan na otro.
Cicilia a expresa satisfaccion cu desaroyo di Corsou como pais y di Aruba como pais y a señala cu tanto AVP como PNP a desempeña un rol importante den diferente desaroyonan di ambos pais.
Mirando dilanti, Cicilia a expresa e deseo pa mantene y sigui reenforsa e lasonan entre ambos partido. E intencion ta pa AVP y PNP sigui sostene otro y mantene e relacion cu durante generacionnan a uni ambos partido.
Clifford Heyliger: “Nos ta un famia”
Parlamentario y Presidente di Directiva di AVP, Clifford Heyliger, a pone enfasis riba un aspecto mas personal di e relacion entre Aruba y e otro islanan.
Heyliger a señala cu hopi famia tin miembronan parti entre Aruba, Corsou, Bonaire y Sint Maarten. El mes a referi na su propio famia, cu tin lasonan cu diferente isla, pa ilustra cu distancia geografico no ta kita e conexion cu existi entre e pueblonan.
Segun Heyliger, cada hende por stima profundamente e isla caminda el a nace y crece, mientras cu na mes momento conserva e lasonan familiar cu otro isla. Pa dje, AVP y Partido Nashonal ta un bon ehempel di e realidad aki: dos partido riba diferente isla, cada un comprometi cu su propio pais, pero cu un historia y relacion cu ta uni nan.
Heyliger a expresa satisfaccion cu Larmonie-Cecilia ta na Aruba pa presencia e momento importante pa AVP. Su presencia ta simbolisa e continuidad di un relacion historico entre e dos partidonan y e lasonan entre Aruba y Corsou.
Congreso 2026: un siguiente capitulo pa AVP
E bishita di Ruthmilda Larmonie-Cecilia ta tuma luga precisamente den un momento di cambio generacional pa AVP.
Durante Congreso 2026, Wendrick Cicilia lo instala como lider di Partido AVP, marcando e relevo den liderazgo di partido. Larmonie-Cecilia lo presencia e momento aki como lider di PNP, partido ruman di AVP y como testigo di un siguiente capitulo den historia di partido.
Congreso 2026 di Partido AVP lo tuma luga diadomingo 4 di october na Aruba Marriott Resort Grand Ballroom, cuminsando pa 9:00 di mainta. Pa mas informacion subi www.avp.aw