Featured Local Noticia Addicional

Sabiduria den nos alegria ! Skirbi pa Ruthy”Lady Ruth” Vrieswijk-Bergen


Saludos ! Danki pa e bunita reaccionnan ricibi pa cu mi buki nobo. Tawatatin mas buki cu a wordo publica y presenta den anja 2020. Un di nan ta e buki “E arte di Padu Lampe “ skirbi pa Stan Kuiperi. Tawata un dushi sorpresa na Unoca, e atardecer di e presentacion y bautizo di e buki di Lady Ruth “Alegria di Ruthy Poema 2 “, ora cu e yui muhe di Padu , Vivian “Vichy” Lampe y su pareha Victor Samuel a entrega na nos como regalo, e buki cu Stan Kuiperi a skirbi tocante  Padu den “E arte di Padu Lampe” cu su version na ingles tambe “The art of Padu Lampe”.  E buki aki ta un sonjo bira realidad di Fundacion pa Promove Cultura di Aruba na Honor di Padu Lampe. Cu un bunita Prologo di sra. Alice van Romondt, presidente di e Fundacion menciona. Un bunita introduccion skirbi pa e autor di e buki aki Stan Kuiperi. Stan Kuiperi mes ta un profeshonal y artista pintor di hopi bunita cuadranan . Kemen, e ta mira y sinti Padu su talento y obranan cu ta masha hopi mes, despues di su viahe interno nos por tribi bisa, pa conose ken y kiko ta e homber bendiciona cu talentonan asina bunita, nos dushi Padu. Un bunita Biografia di Padu Lampe. E buki di Padu Lampe “E arte di Padu Lampe” ta cubri entre otro hopi di e temanan cu Padu a pinta den su bida te na su edad halto . Juan Chabaya “Padu Lampe” a pasa den luz di Bida Eterno , solamente un par di luna prome cu su di 100 cumpleanos. Nos por bisa libremente cu ela yega un siglo na edad. Padu a laga un herencia grandisimo den cantidad y calidad di su arte di skirbi, pinta y toca piano. Nos ta felicita amigo colega pintor Stan Kuiperi, cu a hasi y logra hinka den otro un tremende pero tremendo bunita buki cu tur Padu su logronan, tur locual Padu a hasi den su bida, y tur e herencia cultural cu Padu a laga pa su dushi isla Aruba.

Lady Ruth, cu ta un bon amiga di Vivian “Vichy” e unico prinses di Padu, a skirbi varios poema pa Padu pa cu dia di su cumpleanos durante anjas. Nos tawata hasi esaki di curazon cu hopi amor y carino. Como muestra di aprecio pa e poemanan, Padu a regala Lady Ruth varios di su cuadranan durante anjas y asina tambe nos coleccion di 6 cuadra menciona den Padu su buki.

Sin conta e dos cuadranan cu ela manda pa su yui hombernan na Hulanda. E buki precioso y balioso aki “E arte di Padu Lampe” su texto den man di Stan Kuiperi, e idioma Papiamento a wordo revisa pa Ramon Todd Dandare y e diseno grafico ta di e talentoso artista y fotografo profeshonal Steffen Maas. Oh, pero e buki aki ta asina bunita ! Dushi mes ! Skolnan tin awor den e buki aki masha hopi informacion mes encuanto di bida y talentonan di nos tata di cultura Juan Chabaya “Padu” Lampe. “Padu a percura pa laga un herencia nacional hopi valioso atras pa tur generacion cu ta sigui, cu ta consisti di dos parti :”Un: E tesoro artistico grandi y permanente di pintura, musica y literatura. Den di dos lugar un ehempel personal di gratitud profundo pa bendicionnan di bida y respet pa dignidad y balornan humano. Nos pabien na Fundacion pa Promove Cultura di Aruba “na Honor di Padu Lampe” Tur esaki posibel y danki na Unoca y Prins Bernhard Cultuurfonds Caribisch Gebied.

Pabien na tur cu a coopera den manda potret di nan cuadranan pinta pa Padu Lampe cu ta den e buki . Vichy, mi bunita amiga ruman, Pabien cu e buki di bo tata stima. Padu semper den mente, alma y curazon. Nos tata di cultura, den bunita luz eterno ! Un bunita strea mas na shelo…Love you too !

Un crenchi di nos, encuanto e buki unico “E arte di Padu Lampe” e siman aki den nos relato.

Danki pa su bunita publicacion di curazon . Ban sigui cuida nos salud y duna Dios danki pa bida cu salud y hopi sabiduria den nos alegria ! Pa tur nos lectornan “un dushi dia “ !

 

 

Related posts

Pronostico di tempo diabierna 18 di februari 2022

EA News Author

MetaCorp ta mantene tradicion di hopi aña Mas di 600 empleado a ricibi nan ham di Pasco

EA News Author

Aruba ta briya cu varios medaya na e UANA Pan American Artistic Swimming Championships y ta clasifica pa e Junior Pan American Games

EA News Author

Leave a Comment