Local Social

SABIDURIA DEN NOS ALEGRIA: Skirbi pa Ruthy”Lady Ruth”Vrieswijk-Bergen


Shonnan tur, un bon dia, Nos ta tuma cada dia como un bunita regalo yen di bendicion. Nos ta sigui duna Creador di amor danki pa nos salud y nos sabiduria den nos alegria. E prome luna di aña ta sigui cana poco poco, y ainda nos ta tende un par di klapchi aki aya.  Manera nos a comparti den nos prome relato di anja 2022 un siman y pico pasa, den y durante e cambio di aña nos pensamentonan a dual bai ariba esnan cu ya a bay nos dilanti hopi anja pasa y tambe esnan cu a bay laga nos anja pasa y awor tambe na esnan cu a bay laga nos den e prome simannan di 2022.

 

Famianan y amigonan dificil pa lubida. Manera mi maestro na YMCA Dakota a bisa nos tempo nos tawata mucha, cu “Everybody is Somebody”, ku , tur hende ta un hende special y unico.

Nos ta corda awe ariba algun cu no tey mas cu nos, cu , nan fecha di cumpleanos ta den e luna aki di Januari. Nos ta pensa riba e escritor hulandes cu su relatonan bastante pica, Rene van Nie, Vicente Kelly y Don Ramon Krosendijk dos tremendo musico y cantante.

 

Nan cancion nan inmortal, e.o. Polin tin 7 buraco y Cunucu di Seit. Pa nos pensamentonan hiba nos tambe na amigo colega den radio difusion, e cara mas guapo na Tele Aruba, Ruben Trapenberg, cu tambe ta den e reinonan y hardinnan celestial serca nan stima nan cu a bay nan dilanti. Sin lubida cu dia 25 e luna aki ta Dia di Betico. Sigur cu awor cu lo no tin paradanan grandi di Carnaval, nos ta tende e vos potente di Ruben Trapenberg ta canta su dushi calypsonan, manera e tingeling song. Den ramo di prensa tambe ta corda riba Sonia Wever Schouten di The News, añanan atras, hopi añanan atras. Den fin di siman tray lomba, famianan y amigonan, pueblo uni multicultural di mi dushi bario di Dakota tur dia, mester a tuma despedida di “El hijo del pueblo de Dakota” Johnny Krosendijk, conosi tambe como Johnny Jones, cu a gusta canta su bunita cancionnan ranchera  mariachi. Johnny tabata canta corriendo su bicicleta unico hinca den otro, y hopi biaha cu algun yiunan mara na cabuya riba su lomba. Cu su sombre bisti. Hopi  tabata conosele asina.

 

Y asina nos kier sigui cordele, un hende unico y special, un “great Somebody” ,pasobra si e tabata un crenchi burachi of un crenchi halto di droga, e no tabata molestia ningun hende, perde respet pa ningun hende. E tabata den su mesun mundo asina, hasi su job jobnan aki aya y stima su sra.esposa Mary, cu ken e tabata casa pa 21 aña. Nan bida den ups and downs cu ta normal den tur relacion di pareha, pero, nunca Mary a laga Johnny na caya, semper cu su brasanan habri pa stimele y purba di yudele. Varios biaha nos mes a topa Johnny na cas di su casa Mary, ta chapi cura. E sirbishi di despedida pa Johnny na Iglesia Fatima Dakota tabata hopi bunita, cu cantamento di Etty Toppenberg den compania di su bunita sra.esposa Corma, cu cancionnan ranchera mariachi y despues cancionnan di misa .  Nos no conose e pastor cu a papia, pero ela papia hopi bunita ,tocante  con nos tur por usa nos donnan  ricibi for di Dios, manera Johnny a hasi cu su cantamento, alegra e curasonnan rond di dje. Un miembro di famia elegantemente cu hopi bunita emocion  a describi Johnny  y pafor den un pickup tabatatin e bicicleta di Johnny, cu a wordo drecha y dorna cu flor y yuwana na honor di Johnny. Un speaker pega na un otro pickup, pa a laga cancionnan ranchera resona ora cu a sali fei misa, pa prepara pa bay santana. Despues di a pasa den algun cayanan, tambe den centro di Oranjestad, a bay santana na sabana basora na unda Mariachi Perla a toca y canta, como homenahe di despedida pa un cantante di mariachi, un cantante di cancionnan ranchera di Dakota, di Aruba, cu a laga hopi di nos cu hopi bunita recuerdo. Na Johnny su kerida y bunita mama, su rumannan, su yuinan ,su bunita y humilde sra.esposa Mary y Johnny su yuinan sin dolor, su bisinjanan, su famia y amigonan, nos palabranan di condolencia, consuelo y amor.

Awor Johnny tambe mas serca di nos mente, alma y curason. Nos bario di Dakota tur dia, lo recordabo Johnny.  Locual nos por sigui tende ta e kloknan di Misa ora esakinan resona.

Pero den nos curason nos lo scuchabo ta canta e cancion “Por el amor a mi madre, voy a dejar la parranda” y hopi cancionnan mas di inspiracion. Lieve Johnny, sosega na paz den brasa di bo Creador di amor.

KODAK Digital Still Camera

Related posts

Ministerio di boluntario di freewinds ta sigui dilanti contra covid-19 pa yuda nos comunidad keda saludabel.

EA News Author

E decision a cay cu ta cera tanto Cosecha Oranjestad como Cosecha San Nicolas y nan lo pasa pa pasado

EA News Author

Exitoso torneo di ajedrez na honor di Alvin Howell

EA News Author

Leave a Comment