Despues di 46 aña di servicio dedica na Aruba Bank
Siman pasa, hopi colega di Aruba Bank, hunto cu famia y amigonan cerca di Sandy Geerman, a reuni pa un motibo special: pa celebra Sandy.
Aunke nos ta poco tristo sabiendo cu nos no lo comparti dianan di trabou cu Sandy mas, nos ta contento y hopi orguyoso di por a comparti tur e añanan di trabou cu Sandy.
Cu curason yen, nos ta bisa: Ayooo, Sandy, mientras cu e ta bai disfruta di pensioen bon mereci despues di completa un carrera extraordinario di 46 aña na Aruba Bank.
Sandy a cuminsa su carrera na Aruba Bank: su prome trabou, su unico trabou, y awor tambe su ultimo trabou. Ta poco empleado por bisa esaki, y precisamente pa es motibo nos ta considera Sandy un empleado ehemplar y loyal.
Dia 18 di November, Sandy a baha for di trapi nan di Hato Branch pa ultimo biaha como empleado. Ela sali for di e porta di nos branch lagando atras recuerdonan y experiencianan cu lo keda semper parti di nos historia y di ken nos ta como ekipo.
Awor e ta cuminsa un capitulo nobo y bunita, un capitulo dedica na su mes, su famia y su nietonan.
Den nomber di Aruba Bank, nos kier expresa nos mas profundo agradecimiento na Sandy pa tur e aña nan di dedicacion, compromiso y amor na su trabou. Nos ta pidi cu Dios sigui bendicione cu hopi salud, felicidad y hopi oportunidad pa disfruta su pensioen bon mereci.
Sandy, masha danki pa 46 aña berdaderamente remarcabe
Press Release Aruba Bank
