Den ballroom di Holiday Inn Resort a tuma luga, e siman cu a pasa, e graduacion di e chikitinnan di Scol Preparatorio Aurora na Tanki Leendert. Un total di 38 curason chikito a ricibi nan certificado for di man di nan juf cu pa 2 aña cu cariño a educanan preparando nan pa scol basico. E tema tawata Lilo & Stitch.
Tawata directora Jessica Anthonij cu a yama un y tur bonbini gradiciendo cada mayor p’e confiansa deposita den SP Aurora. E mc, pa di 6 biaha, tawata Addonsito Croes y e grupo di baile invita tawata Diamond Dance. E oracion di dia a ser haci pa Alisha di klas 3 bou guia di juf Fausia. E dia aki a tuma despedida di juf di FAVI esta Jovêlle Castro y juf Maryline Boekhoudt cu ta bay otro scol. E team completo consistiendo di juffrouwnan Lianne Tromp, Maryline Boekhoudt, Mae Tam, Fausia Santos y directora Jessica Anthonij a desea tur e chikitonan hopi éxito na nan scol nobo.
