Fundashon Muhénan Uniformá Armá (Fundashon MUA) djaweps último a selebrá nan di 17 aña di eksistensia.
Esei a tuma lugá pareu ku selebrashon di Dia di Empleado Públiko.
Fundashon Muhénan Uniformá Armá ta konsistí di 5 organisashon ku tin hende muhé uniformá armá den servisio.
Esakinan ta Kuerpo Polisial, Kuerpo di Duana, Sentro di Detenshon i Korekshon Kòrsou, VKC i Warda Costa.
E atardi a kuminsá ku presentashon di Reverendo Canon Louise de Bode-Olton di Iglesia Anglikano Episkopal ”Church of the Resurrection” kende a pone atenshon pa futuro di Muhénan Uniformá Armá ta pa eliminá stigma i diskriminashon den kuerpo uniformá armá; pa para pa loke ta hustu i inklusivo den kuerpo di muhénan uniformá armá den sektor públiko; pa nan bunitesa radiante inspirá komunidat i hende muhénan hóben i pa nan ta e vehikulo pa hasi hende muhé uniformá armá mas visibel i mas konsiente ku su aporte ta hasi un diferensia pa yega na un mihó komunidat pa un i tur.
Despues tabatin presentashon di agente polisial Thaïma Osepa MBA kende siguiendo e topiko di ‘Muhé empoderá, empoderando otro muhénan’, a mustra ku komo hende muhé uniformá armá mester komplementá otro i no kompetí ku otro.
Otro oradó tabata Pedzi Girigori MSc, hefe di Operashon na Departamentu Meteorológiko di Kòrsou kende a elaborá riba Metanan di Desaroyo Sostenibel i desigualdat di genero. Su mensahe tabata ku hende muhénan no a yega ainda den nos pais desaroyá i ku nos mester kibra ku e stigma aktual ku ta eksistí di kon nos ta trata hende muhé i kon ta trata hende hòmber.
Finalmente tabatin oradó Reyna Joe ku ta organisadó di e Konferensia Anual di Liderasgo Femenino na Kòrsou for di 2004, kende a motivá profeshonalnan uniformá armá pa nan dokumentá nan mes den buki ku por sirbi komo motivashon i empoderamentu pa hende muhé hóben ambisioso, miéntras ku nan eksperensianan por keda kompartí.
Promé minister di Kòrsou Gilmar Pisas durante di e atardi a honra muhénan uniformá armá ku su presensia selebrando tambe huntu ku nan.
E promé mandatario elokuentemente a mustra kon importante muhénan uniformá armá ta pa kuerpo di empleado públiko.
I na final di su presentashon el a firma e Manifesto di Fundashon Muhénan Uniformá Armá kaminda ta boga pa un koperashon interministerial i koperashon di parti di gobièrnu pa por kumpli ku metanan na bienestar di empleadonan públiko, servisionan i komunidat di Kòrsou.
Tur aña den kuadro di Dia Internashonal di Empleado Públiko, ta reafirmá e koperashon i kolaborashon, firmando e Manifesto di Fundashon Muhénan Uniformá Armá.
E programa interesante aki a finalisá ku un pènel ku oradónan kaminda ku a debatí ku presentenan kon nan komo hende muhé empoderá por empoderá komunidat di Kòrsou.
Tambe a bini dilanti ku komo hende muhé uniformá armá bo mester ta bon prepará i pa esei mester lesa hopi.
Ta p’esei tambe a regalá tur partisipante un òf mas buki.
Importante ta tambe pa sa kon nos komunidat ta fungi i kua ta nesesidatnan pa por implementá Metanan pa Desaroyo Sostenibel. Mester yega na ekilibrio di hende muhé den posishonnan di liderazgo i di tomo di desishon, pa por tin un refleho real di hòmber i muhé den nos komunidat.
Organisadó di e evento i presidente di Fundashon Muhénan Uniformá Armá Casandra Martha na final a gradisí tur presente i a afirmá pa esnan presente ku nan trabou ta di gran balor pa un komunidat salú i el a gradisí maestro di seremonia Jeannique Sillie pa su bon trabou.
Riba e potrètnan por mira momentunan durante di selebrashon di 17 aña Fundashon Muhénan Uniformá Armá.
