Konseho Sosial Ekonómiko (SER) a entregá ayera, djaluna 15 di aprel
2024, un konseho detayá riba un inisiativa di lei pa introdusí un areglo di verlòf paternal. E inisiativa aki a
ser proponé dor di frakshon di MAN den Parlamento i tin komo ophetivo introdukshon di un areglo
general di verlòf paternal di sinku dia di trabou pa tatanan ora nan yu nase.
E petishon pa konsulta a ser risibí den e último kuartal di aña pasá. Sinembargo, e proseso di konseho a
tuma mas tempu ku a spera pa motibu ku a reahustá e agènda di investigashon i konseho di SER den e
último lunanan di 2023. No opstante di esei, e konseho di SER ta basá riba un investigashon riguroso riba
e tema, inkluso un análisis profundo di literatura eksistente, investigashon komparativo entre paisnan, i
entrevistanan ku vários perito den komunidat.
E konseho di SER, solisitá pa Presidente di Parlamento, ta hunga un papel importante den e proseso
legislativo i tin komo meta pa informá Parlamento di e posibel efektonan sosioekonómiko ku por surgi
dor di implementashon di e areglo proponé.
SER a evaluá tur aspekto relevante di e proposishon di inisiativa di lei, inkluso e konsekuensianan legal i
finansiero i e impakto sosioekonómiko. Ademas, e konseho ta hasi rekomendashonnan pa komuniká e
kambionan pa informá tantu empleadonan komo trahadónan di un forma adekuá riba e reglamentashon
proponé.
Segun e órgano konsultivo tripartit, e paso aki ta marka un desaroyo importante den legislashon
sosioekonómiko di Kòrsou, ku efektonan di término largu riba merkado laboral i riba komunidat en
general.
SER ta emití konseho riba introdukshon di verlòf paternal
