Seri di televishon Waya Bo Man ta mustra kultura di hende surdu

Riba djadumingu 28 di sèptèmber E seri nobo di televishon Waya Bo Man ta ranka sali. Den dies episodio bo ta sera konosí ku e mundu kolorido di e kultura di hende surdu na Boneiru.
E presentadó Reksel Engelhart ta hiba e televidente den un biahe ku hopi storia i enkuentro spesial. E ta haña yudansa di e reporteronan di 11 aña Miek i Jelaya, ku tur kaminda na nos isla ta hasi habitantenan pregunta tokante bida ora bo ta surdu. E eksperto di hende surdu Maxima ta tradusí kada palabra den gestonan harmonioso i ekspresivo, i e intérprete Esther ta kompartí su konosementu i vishon ku e públiko.
E seri ta yen di sorpresa. Por ehèmpel diessinku mucha di Kolegio Kristu Bon Wardador ta kanta Himno di Boneiru hasiendo e gestonan nesesario. I tin un reto emoshonante di gesto, kaminda nuebe boneriano konosí huntu ku vários habitante surdu di nos isla ta kompetí pa un trofeo hopi kodisiá.
Por mira e promé episodio na NosTV Boneiru durante Dia Mundial di Hende Surdu, riba djadumingu 28 di sèptèmber pa 15:15 or. E ripitishon ta sigui riba djalunan 29 di sèptèmber pa 21:15 or. Na Energia TV Bonaire nan ta transmití e episodio riba djárason 1 di òktober pa 18:00 or i riba djaweps 2 di òktober pa 08:00 or di mainta.
Ku Waya Bo Man e produktornan ke mustra kon riku, kreativo i inspirativo e kultura di hende surdu ta. E ta bira un fiesta pa nos wowo, nos orea i nos kurason.
No keda sin wak huntu ku nos! Bo tambe ta Waya Bo Man?