Minister di Husticia Arthur Dowers ta duna di conoce cu situacion di trafico ta un punto cu a haya hopi atencion den gobierno di AVP den pasado y esaki no ta bay ta un excepcion pa e gobierno nobo AVP-FUTURO. Te ainda no mira riba un plan y of maneho riba papel cu a keda entrega pa situacion di trafico, pero ta spera den e reunionnan cu lo tuma luga lo mira con lo sigui atende cu e situacion di trafico na Aruba. Te ainda no a mira dossiernan di e gobierno anterior riba e maneho y proyectonan cu a keda hiba riba trafico den e ultimo añanan.
Na momento cu ricibi informacion di e trabounan cu a haci den trafico, lo mira kico por cambia of por haci miho. Pa gobierno di AVP –FUTURO siguridad di trafico ta importante , si ta corda anteriormente a inverti den polisnan motorisa pa haci control nan extenso riba caya pa coremento duro y alcohol den trafico. Tambe lo mester traha riba e velocidad den trafico, esaki ta un di e problemanan principal pa diferente accidentenan cu ta tuma luga. Siguridad di trafico tin di haber cu comportacion , tuma di risico y cierto forma di custumber, esaki ta cosnan cu mester cuminsa atende cu ne. Pa loke ta trata e parti di seguro, esaki ta un otro reto y mester mira mas di cerca con lo mester atende cu e parti aki tambe den futuro pa asina garantisa di esunnan cu si ta cumpli cu ley cu na propiedad ta protegi.
Lamentablemente departamento “openbarevervoer” no ta funciona manera mester ta, hopi biaha hende ta busca un wacharaca pa nan core cu ne debi cu nan no tin suficiente medio pa cubri e resto di costo nan cu mester cubri, pero tampoco nan no por haci otro debi cu mester tene cuenta cu diferente situacion.
Minister di Husticia ta manda palabra di condolencia na e famia cu a perde su bida na Savaneta den trafico pero na mes momento ta haci apelacion na tur esunnan cu ta mobilisa den trafico pa nan tene cuenta cu no ta nan so ta riba caminda pero tene cuenta cu e otro hende nan den trafico.