Ta bai manda karchi di vota

Durante e próksimo simannan ta manda e karchinan di vota pa e habitantenan ku derecho di voto. Si den siman di 1 di mart no a risibí e karchi di vota via pòst, e ora ei votadónan por bai tuma e karchi di vota for di 6 di mart na departamento di Registro Sivil. Hopi biaha ora ku no a risibí un karchi di vota, esaki ta konsekuensia di falta di un brivenbùs òf di hendenan ku a muda i ainda no a duna nan adrès nobo na Registro Sivil.

Mirando ku ta emití e karchinan di vota na hulandes, por wak e tradukshon riba e página wèp https://www.bonairestemt.nl/stempas/ pa mas klaridat.

Paga tinu: si bo tin derecho di voto pa elekshon di Kolegio Elektoral tambe, bo ta risibí dos karchi di vota na kas. Un karchi di vota pa elekshon di Konseho Insular i un karchi di vota pa elekshon di Kolegio Elektoral. Bo ke vota pa tur dos elekshon? E ora ei bai ku tur dos karchi di vota na e urna elektoral.

Pa bai tuma bo karchi di vota, for di djaluna 6 di mart bo por akudí na departamento di Registro Sivil na Kaya Neerlandia 40, durante e orario regular for di 08.00 or te 15.00 or. Den kaso ku bo no a risibí bo karchi di vota pa motibu di un adrès bieu òf robes, nos ta supliká bo tambe pa inskribí bo datonan di adrès korektamente.