LocalFeatured

Ta descubri mas cu 20 especie di mata nobo pa Aruba

Melochia Parvifolia Ta Descubri Mas Cu 20 Especie Di Mata Nobo Pa Aruba

Despues di 2 siman di estudio, expertonan international, local y boluntarionan ta descubri mas cu 20 especie di mata nobo pa Aruba

Fundacion Parke Nacional Aruba (FPNA), un fundacion independiente encarga cu e conservacion y maneho di areanan terestial y marino proteha na Aruba hunto cu Wageningen University & Research (WUR) y Carmabi ta anuncia cu mas cu 20 diferente sorto di especie di mata nobo a ser descubri pa Aruba. Den un periodo di 2 siman, Dr. André van Proosdij y Dr. John Janssen di Wageningen University & Research hunto cu Erik Houtepen, Head of Consultancy Department di Carmabi,
Giancarlo Nunes, Research and Conservation Manager di FPNA, partnernan local y boluntarionan a bay bishita diferente areanan na Aruba manera Saliña Malmok, Saliña Cerca, Ser’i Teishi y Sero Colorado pa asina studia mas di Aruba su vegetacion.

E ultimo estudio di vegetacion cu a wordo haci na Aruba tawata den añanan 1990 y a wordo haci door di John de Freitas di Carmabi. E raport aki no a wordo publica, sinembargo, aña pasa, Dutch Caribbean Nature Alliance (DCNA) y Wageningen University & Research (WUR) a aloca fondonan pa asina completa y publica e raport di vegetacion di Aruba.

Como parti di e estudio di vegetacion, e team di experto international cu ta na Aruba tambe a hasi un reencuesta den e areanan unda a hasi e estudio di vegetacion den añanan 1990, tambe a mapa areanan protehi cu no tawata parti di e estudio di vegetacion hasi anteriormente, a registra especie di matanan
encontra na Aruba den e databse di distribucion di mata cu a wordo lansa e siman cu a pasa. Y por ultimo, e team a bin pa crea capacidat di nos partnernan local y boluntarionan di organisacionnan manera Directie Natuur en Milieu (DNM), StimAruba, Ban Lanta y Planta y Santa Rosa pa asina ekipa otro organisacionnan
cu conocemento y habilidad pa asina por tin mas hende cu tin e capacidad pa hasi estudio di flora y vegetacion pa Aruba.

E estudio di vegetacion cu a tuma lugar e ultimo dos simannan aki lo provee datonan cu lo wordo usa pa un analisis preliminario pa wak con e vegetacion di Aruba a cambia e ultimo 25 añanan. Loke si por wordo confirma ta cu mas di 20 diferente especie di mata nobo a wordo descubri pa Aruba, y algun di e especie di
matanan aki ta nobo pa islanan ABC y hasta algun cu ta nobo pa Caribe Hulandes. Casi mita di e especienan nobo di matanan discubri ta nativo pa e region di Caribe y por wordo considera como natural pa e flora di
Aruba. Algun ehempel ta e Melochia parvifolia y e Cienfuegosia cf. affinis cual a wordo descubri door di expertonan local. E otro mita di matanan cu a wordo descubri ta bin di otro partinan di mundo y cu a wordo introduci na Aruba intencionalmente of accidentalmente. Algun di e matanan aki ta invasivo y ta presenta un menasa pa Aruba su ecosistema natural. Algun ehempel di esakinan ta Cylindropuntia tunicata y Scaevola taccada. E data cu a wordo colecta di especie di mata y vegetacion lo contribui na mihor conocemento, comprendemento y conservacion di Aruba si patrimonio natural.

Por ultimo, desde aña 2018, Wageningen University & Research y Carmabi ta trahando hunto pa colecciona dato historico y dato mas recien tocante composicion di vegetacion y distribucion di cierto especie di mata na e seis islanan di Caribe Hulandes. Observacionnan di mata di e database CACTUS aki awor ta disponibel online atraves di e website di DCBD (http://speciesdistribution.dcbd.nl). E website aki a wordo lansa na Aruba e siman cu a pasa aki.

E database CACTUS ta consisti di alrededor 2,500 releves di vegetacion digitalisa, resultando den casi 40,000 observacion di especie di mata. Esakinan ta keda complementa pa casi 10,000 registracion di mata cu potret digital, database di cuidadanonan cientifico, herbaria, reportahe di inventario y registracion adicional di veld. Pa mas di 80% di e total di e especienan di mata vascular nativo y no nativo presente na e seis islanan, awor ta dispone di algun observacion, cu ta cubri principalmente e periodo di 1950 pa 2022.

Actualmente ta ehecutando un proyecto NLBIF cu e meta pa digitalisa registro di herbario historico adicional pa tur e seis islanan.

E datonan ta presenta riba un resolucion cuadra di 1×1 km den e website. E datonan geograficamente mas detaya ta disponibel ariba peticion, cu tin un meta cientifico of di conservacion. E website ta permiti seleccion di observacion dentro di temporada di aña, unda ta permiti analisis di tendencia di distribuicion di cierto especie, specialmente den areanan cu a wordo bon estudia. E analisis di tendencia ta un herment esencial pa construi listanan cora di especie den peliger di extincion. Ademas ta posibel pa mira gap di data pa especienan specifico, loke por anima e jaagdonan di mata entusiasma pa provee registro di observacion
nobo di e matanan aki.

E cantidad di observacion pa isla ta diferencia hopi, cu mayoria di e registronan (56 %) di Corsou, sigui pa Aruba (13%) y Boneiro (11%). Pa Sint Maarten, e datonan ainda ta relativamente scars. Ta agrega registro nobo ariba base regular, despues di cua ta actualisa e data presenta den e website di DCBD.

Fundacion Parke Nacional Aruba ta maneha aproximandamente 24% di Aruba su tereno natural cual ta designa como area natural protehi y como un organisacion di maneho di conservacion nos ta comprometi na preserva, proteha y mantene un sistema ecologico cu ta diverso, saludabel y resiliente pa Aruba.

Cienfuegosia Cf. Affinis...

Related posts

Hofi den bario pa 60 +

EA News Author

Pastor Marcel Balootje: E presencia di Dios ta mas poderoso cu tur mal influencia

EA News Author

Departamento di Aduana ta pidi biaheronan pa tene cuenta cu permiso di importacion

EA News Author

Leave a Comment

Whatsapp Message