Señora Amory Swindel prosedente di Merka a haña rekonosementu komo embahador di Boneiru den kategoria di platina pa su di 30 aña di bishita na Boneiru.
Riba djaluna 24 di mart último, un dia promé ku su kumpleaño, sra. Swindel a keda honrá na Captain Don’s Habitat. Tabata un momentu di emoshon ora ku a pidi tur presente pa djòin i dun’é un pabien kantando.
Sra. Swindel a keda sumamente emoshoná pa esaki i a gradisí pa e sorpresa ku el a haña. Na nòmber di gerensia di Ofisina di Turismo, Helen Mercera a ofisialisá e seremonia di rekonosementu, mientras ku sra. Claire Thielman-Sealy a hasi entrega di e plakat korespondiente.
Pareha Michael i Linda Drabik tambe a keda honrá pa nan di 10 aña bishitando Boneiru. Na e okashon aki a entreganan feneta di bròns.
TCB ta felisitá e embahadornan nobo i ta konta ku sigur nan lo sigui bishitá Boneiru den futuro.
