Stichting Monumentenfonds Aruba (SMFA) banda di nan tarea principal di cumpra restaura, mantene y huur edificionan monumental a bin ta enfoca hopi e ultimo añanan na conscientisacion y educacion tocante importancia di monumentonan di Aruba como parti di nos herencia cultural.
Algo cu a resalta hopi ora SMFA a cuminsa cu charlanan na scol algun aña pasa ta cu mayoria di e alumnonan di edad mas jong no tabata conoce e palabra monumento.
Asina a cuminsa cu banda di presentacionnan na scol a organisa diferente proyectonan pa hobennan y tambe a crea na 2015 hunto cu studiantenan di IPA un buki ‘monumentenwandeling’ cu a ser reparti e tempo ey pa tur alumno di scol basico na Aruba.
E biaha aki SMFA kier a enfoca un tiki mas riba esnan mas chikito. Si bo tin un fundeshi bon traha bo sa cu e cas lo ta uno fuerte y asina nos kier cuminsa siña nos muchanan di mas jong kico ta un monumento.
‘Un raton den Stadhuis’ ta un storia crea cu e meta pa introduci na muchanan entre 4 pa 8 aña e palabra monumento y tambe pa nan compronde kico ta un monumento, cu nan ta importante pa Aruba y cu nos tur por contribui na cuidanan.
A traha e storia den forma di un audiobook tanto na Papiamento como na Hulandes. Na final di e storia por scucha un bunita cantica tocante monumentonan di Aruba skirbi pa señor Robert Reeberg.
E storia ta trata di famia Pieper cu ta tene un celebracion grandi den e Stadhuis pero ta resulta den un problema grandi.
E audiobook ta riba youtube di SMFA y por haya e link tambe riba nos pagina di Facebook: Stichting Monumentenfonds Aruba. E ta pa uzo liber y nos kier stimula tur maestronan di scolnan preparatorio y primario pa haci uzo di esaki.
SMFA kier yama danki na tur cu a traha riba e proyecto aki:
Texto: Mircla Nava , Ilustracion : Joost Horward, storia conta pa: Shahayra Willems, Cantica: Robert Reeberg, Cantantenan: Gislaine Coffie, Ann-Jillian de Haseth, Vanessa Gutierrez y Robert Reeberg , editing: Willemsproduction.
Nos ta orguyoso di por a realisa un proyecto mas cu e meta pa preserva nos pasado pa futuro.