Durante un encuentro institucional reciente na Quinta del Carmen, e representante nobo di Hulanda pa Aruba, Curaçao y Sint Maarten, Gerbert Kunst, a comparti su punto di bista riba e importancia di bon gobernacion tanto na Aruba como den Hulanda.
Kunst a indica cu e ta contento di ta presente na Aruba y cu e rol di representacion Hulandes den e paisnan di Caribe Hulandes ta pa mantene contacto directo cu e desaroyonan politico y administrativo. Segun Kunst, e presencia di un representante Hulandes na Aruba ta facilita pa Hulanda por sigui mas di cerca e pasonan cu gobierno di Aruba ta tuma y e posicionnan oficial cu e pais ta adopta.
Importancia di bon gobernacion
Durante su declaracion, Kunst a enfatisa cu bon maneho di pais ta un responsabilidad comparti. Segun Kunst, tanto gobierno di Aruba como Hulanda tin un rol importante den garantisa un gobernacion responsabel y transparente.
E representante Hulandes a menciona tambe e rol di organisacionnan manera VNO, cu segun Kunst ta importante pa scucha y representa e voz di e comunidad empresarial y civil. Segun Kunst, participacion di diferente sectornan di comunidad ta contribui pa fortalece e base pa un maneho efectivo di pais.
Conversacion riba LIM
Durante e encuentro, tambe a trata e tema di Landsbesluit Inrichting Ministeries (LIM). Segun Kunst, e no tabata na altura cu e proseso riba e LIM ainda no tabata completamente na ordo despues di aproximadamente un aña di gobernacion.
E comentario aki a sali durante un conversacion informal cu representantenan di prensa, den cual a discuti e situacion institucional actual y e importancia di tin claridad den estructuracion di ministerionan y carteranan gubernamental.
Segun observadornan, e tema di e LIM ta keda un punto importante den e debate politico actual, paso e ta determina con carteranan ministerial ta wordo distribui y con responsabilidatnan dentro di gobierno ta wordo organiza. Na momento cu e LIM ainda no ta completamente na ordo, tin hopi discusion riba con e gobierno AVP-FUTURO ta maneha e estructuracion di ministerionan.