ORANJESTAD,Aruba
Pa mas cu 3 luna largo Gobierno di Aruba y DVG a informa y educa comunidad henter encuanto e medida di proteccion pa preveni contra e virus di Covid-19. E medidanan ta ensera entro otro; mantencion di distancia di 1.5 meter for di otro persona, labamento di man frecuentemente cu awa y habon, evita aglomeracion di hende y si bo ta malo cu sintoma keda cas y tuma contacto cu bo dr di cas.
Pa cumpli cu e medidanan aki DVG a traha diferente protocol pa diferente sector, pa asina yuda haci e medidanan di prevencion mas comprendibel, practico y visibel. E protocolnan ta regla cu na entrada di cada localidad of establecimento mester tin handsanitizer accesibel pa e cliente, e establecimento mester tin señalnan di indicacion den forma di linea/ flecha riba vloer of borchinan pa regula e distanciamento entre clientenan. DVG ta urgi tur establecimento, localidad, organisacion y sector pa repasa un biaha mas e protocol cu ta conta pa nan y controla boso espacio si boso ta cumpliendo cu e medidanan y si tur material di indicacion tey y ta visibel ainda. Si esaki no ta e caso, mester renoba esakinan y percura pa cumpli cu reglanan di e protocol.
Awor cu Aruba ta habriendo su frontera gradualmente pa turista, ta hopi importante pa nos como comunidad cuminsa aplica loke nos a siña. E periodo di test a pasa y awor a yega e Realidad Nobo pa aplica e Normal Nobo. E normal unda cada uno di nos como individuo ta responsabel pa aplica e medidanan di proteccion si nos kier proteha nos mes y nos famia di Covid-19. Cu habrimento di nos frontera, gobierno a percura pa un bon screening y conrtrol na nos Aeropuerto, sinembargo apesar di e control aki nos mester ta conciente cu un mimimo di casonan por logra pasa toch. Esaki pa motibo cu tin un periodo di incubacion di 2 siman cual ta haci cu un persona no tin suficiente virus ainda ta dificil pa e wordo detecta y test positivo. Pesey e reglanan di comportacion y medidanan di proteccion tey.
Nos suplica ta na comunidad completo, si bo ta aplicando e medidanan di proteccion, SIGUI haci esaki cu discplina. Na esnan cu e ultimo tempo a descuida y no ta aplicando esakinan mas, e momento a yega pa cuminsa aplica esakinan atrobe.