ORANJESTAD, Aruba
Camara di Comercio y Industria (KvK) ta gradici Gobierno di Aruba pa e oportunidad di por a ricibi informacion encuanto e pakete di condicion cu Hulanda a presenta pa por bin na remarca pa e tercer financiamento cu ta necesario pa por duna sosten na comercio y personanan cu a perde entrada. Minister-Presidente, sra. Evelyna Wever-Croes, a indica cu tin 18 condicion mara na e financiamento di Hulanda y cu Aruba mester cumpli cu tur pa por bin na remarca. Sinembargo, Hulanda a prohibi Aruba pa por haci e documento aki publico, locual ta impidi Aruba di por hiba un discusion sano si e condicionnan ta rasonabel, factibel y si lo por wordo ehecuta a corto plaso. Aunke KvK a vocifera pa basta aña caba cu algun reformacion ta necesario pa por mantene finansas publico duradero y a duna varios recomendacion, no ta posibel pa por bay di acuerdo cu e condicionnan stipula door di Hulanda sin tin previo conocemento di e contenido di e pakete di condicion. Na momento cu e documento wordo haci publico, KvK lo desea di haya e oportunidad pa por duna su opinion y contribucion.
KvK ta sorprendi cu Hulanda a scohe pa un proceso cu no ta transparente.
KvK ta conciente cu ta urgente y necesario pa ricibi fianciamento pa e economia di Aruba por lanta cabes bek y pa por provee den e necesidad humanitario. KvK ta keda disponibel pa participa den e discusionnan con por realisa e meta aki.