ORANJESTAD, Aruba
Den e sentencia di juez diabierna 21 di augustus, algo cu a resalta ta e gran cantidad di peticion cu e ciudadano Balentina a presenta cualnan a wordo rechasa pa juez. E puntonan aki ta refleha cu sra. Balentina no ta actuando como representante di e bario, sino a base di interes personal pa cu e situacion cu tin cu dump. Mester accentua cu dump ta un reto pa decadanan caba y cu Gobierno ta atendiendo cu ne. Juez a pone extra enfasis riba e hecho cu sra. Balentina ta actuando pa su mes y no den nomber di bario. Ademas, Juez a constata cu na niun momento sra. Balentina por a prueba cu e ta actuando den nomber di e bario. Pues e bario no a duna sra. Balentina e autorisacion pa actua den nan nomber.
E peticion di sra. Balentina ta pa Pais Aruba stop cu actividadnan di procesamento di sushi pa motibo di diferente molester. Loke ta resalta ta, cu bao di e capa di molester, sra Balentina a mar’e peticion na diferente condicion, esta cu el a haci diferente exigencia pa su mes y no pa e bario.
Sra. Balentina a pidi pa Pais Aruba carga e gastonan pa re-aloca su famia dunando e un cas di Gobierno, pa por lo menos 2 aña.
E insistencia di sra. Balentina pa keda den e bario cu segun e ta malisimo pa e y su famia no a cay den bon tera cerca juez, sabiendo cu e tin un tereno na Malmok cu a wordu otorga na su persona den pasado. Pues e tin alternativa pa muda den un otro area. Ademas e ta pidi pa Pais Aruba page 50 mil florin pa dia, den caso cu Pais Aruba no cumpli cu e peticionnan cu e ta haci na Juez. Juez a rechasa tur peticion pa recompensa “schadevergoeding” na sra. Balentina. Juez a indica cu den caso cu Pais Aruba mester paga un suma “schadevergoeding”, esaki lo bay pa Crus Cora cu ta un organisacion reconoci pa tene cuenta cu bienestar general. A base di e peticionnan aki mes, por conclui cu no ta actuando na beneficio di e bario, paso si esaki lo tabata e caso, lo mester a pidi pa compensacion pa e bario y no pa su mes.
Otro puntonan cu juez a rechasa di sra. Balentina ta e hecho cu ‘su bida ta core peliger’ (acuut levensgevaar), den sentido di cu tin riesgo di explosion a consecuencia di kerosin den truck nan riba e ruta dilanti su cas. E scenario aki mas bien a wordo dramatisa door di sra. Balentina, y juez a mustra cu teniendo na cuenta distancia di e habitante en cuestion y e areanan indica cu por ocasiona un explosion ta leu suficiente y no lo ta afecta.
E argumento di distancia y posicionamento di sra. Balentina su cas ta locual juez a uza pa descarta varios punto mas, manera huma y holor di dump.
Pa termina, juez ta mustra cu e dump ta na e sitio aki pa 60 aña caba y no ta asina cu por cera dump inmediatamente manera cu sra. Balentina ta pidi. Sra. Balentina tin un cas pa 7 aña den e area, y a pesar cu e situacion di maneho di sushi ta ricibiendo su atencion, eta keda algo cu un persona mester considera prome cu e scoge pa tin un cas den e area.
