Ministerio di Husticia ta bay dilanti cu plannan pa expande temporalmente e capacidad di detencion di Sint Maarten mediante mehoracionnan na e Centro di Detencion pa Extranhero (FDC), creando espacio pa te cu 16 deteni di bajo riesgo mientras cu e prizon nobo di Point Blanche ta den construccion.
E intervencion aki ta forma parti di e Programa di Reforma di Sector di Detencion (DSRP) mas amplio di e Ministerio y a wordo formalisa mediante un amienda cu ta expande e Proyecto di Facilidadnan di Estado di Derecho di Sint Maarten bao di e acuerdo existente entre Gobierno di Sint Maarten, Gobierno di Hulanda y Oficina di Nacionnan Uni pa Servicionan pa Proyecto (UNOPS).
Un evaluacion tecnico preliminar a identifica cu e adaptacion di e Centro di Detencion pa Extranhero (FDC) na Simpson Bay ta e opcion mas factibel y rapido pa expande e capacidad di detencion a corto plaso. Ta spera cu e traba aki lo tarda aproximadamente nuebe luna for di e aprobacion pa tur partidonan te cu e entrega, brindando espacio adicional di seguridad bajo pa alivia e presion di capacidad, apoya e trabao di fiscalnan y cortenan, y reduci e risconan relaciona cu hacinamento (overcrowding).
E espacio adicional aki lo apoya e transicion pa e prizon nobo di Point Blanche y, una bes cu e uzo temporal pa detencion di prizon termina, e area mehora lo wordo devuelve na e Servicio di Inmigracion pa detencion relaciona cu inmigracion. Por lo tanto, e mehoracionnan aki lo sirbi tanto e necesidad directo pa capacidad adicional como e funcion a largo plaso di e facilidad, cu seguridad mehora y infraestructura esencial cu ta apoya su uzo continuo.
Minister di Husticia Nathalie Tackling a subraya e importancia di atende cu e necesidadnan actual di e sistema di detencion:
“Mientrastanto cu e construccion di e prizon nobo di Point Blanche ta progresando, nos tin cu enfrenta tambe e realidadnan cu nos sistema di detencion ta pasando aden awe. Mediante adaptacion di un seccion di FDC cu no ta den uzo actualmente, nos lo crea capacidad temporal adicional sin interumpi e uzo continuo di e facilidad pa detencion di inmigracion. Esaki ta duna nos un solucion temporal practico mientras nos ta sigui traha riba e reformanan a largo plaso cu ya ta andando. Importante ta cu e inversion aki no ta temporal; e mehoracionnan lo keda y finalmente lo fortifica e infraestructura di FDC pa su uzo continuo pa Inmigracion.”
UNOPS, como e socio di ehocecion, lo supervisa e diseño, e compra y e ehocecion di e mehoracionnan pa optimisa seguridad, funcionalidad y e condicionnan di detencion. E traba lo wordo guia pa regulacionnan nacional y normanan internacional di detencion relevante, incluyendo e Reglanan Minimo Estandar di Nacionnan Uni pa e Tratamento di Presonan, conoci como e Reglanan di Nelson Mandela.
“Apoya gobiernonan caribense den fortificacion di nan sistemanan di husticia ta nifica yuda transforma prioridadnan nacional den facilidadnan y servicionan cu ta respeta dignidad humano y cu ta permiti institucionnan cumpli cu nan responsabilidadnan. Na Sint Maarten, UNOPS ta apoyando Ministerio di Husticia pa atende necesidadnan directo di detencion mientras ta desaroya capacidad pa futuro”, Giuseppe Mancinelli, Director di UNOPS pa Barbados y Coordinador pa Caribe, a declara.
Hunto cu e trabao di construccion, e preparacionnan lo inclui procedimiento pa e maneho y mantencion di e facilidad. Gobierno di Sint Maarten lo provee e personal di custodia necesario pa e facilidad bira operacional una bes cu e mehoracionnan keda listo.