E rol y e autoridad di Inspectorat di Cuido di Salud Aruba (IVA) mester keda respeta y manteni pa garantisa e standard di mas halto di cuido pa e pueblo di Aruba. Asina presidente di e comision di salud den Parlamento a enfatisa, marcando e posicion cu IVA, como un instituto independiente, tin tanto e derecho como e deber legal pa interveni den cualkier institucion di cuido ora tin indicacion di iregularidad.
E ehempel di e autonomia aki ta cubri tur entidad dentro di e sector, for di casnan di cuido pa nos grandinan te cu institucionnan mas grandi manera Hospital y ImSan.
Supervison Independiente y Accion Inmediato
E inspectornan ta baluarte di supervision y mester por actua sin ningun tipo di impedimento ora señalnan di preocupacion yega su porta. Den pasado, e intervencionnan di IVA a demostra di ta efectivo y necesario pa proteha e bienestar di e pashentnan, yega di ser conduci te hasta na e ciere temporal di casnan di cuido cu no tabata cumpli cu e reglanan y e standardnan di calidad rekeri, esaki mester por conta pa Hospital tambe.
E proceso aki ta stipula cu ora tin motibonan stipula (“gronden”), e deber di IVA ta pa drenta, investiga, haci e estudionan y e research necesario, y tuma e medidanan stipula pa ley. Mantene e independencia aki ta e unico manera pa garantisa cu e sistema di cuido di salud ta keda transparente, sigur, y di confiansa pa henter e comunidad.
Pa loke ta trata e trabou parlamentario, presidente di e comision di salud Gino Goeloe ta reitera su compromiso pa scucha y traha hunto cu tur e actornan den e campo ta necesario. Durante e ultimo aña aki, mas di 10 fundacion y organisacion di cuido a presenta dilanti e comision pa comparti nan expertise, nan preocupacionnan y e retonan cu nan ta enfrenta diariamente.
Banda di e presentacionnan aki, e comision ta sigui realisa bishitanan di trabou (werkbezoeken) pa tuma nota di e realidad riba tereno. E porta di Parlamento ta keda completamente habri pa tur fundacion, profesional, y instancia cu kier presenta nan inkietudnan, cu e meta pa busca solucionnan conhunto y mira con for di e poder legislativo por yuda mehora e sistema di cuido na Aruba.