Diahuebs ultimo e Centro di Operacion Maritimo (MOC) di Wardacosta a ricibi un yamada pa asistencia di un boto di piscado cu tabatin problema cu su motor. Na e momento ey, e boto cu yama Charnelle tabata na altura di Westpunt cu dos homber local na bordo.
A base di e notificacion aki MOC a dirigi e helikopter di Wardacosta pa e localidad di e boto pa por evalua e situacion. E boto Charnelle no tabatin marifoon (radio VHF) na bordo. Pa e motibo ey e dos hombernan tabata por a comunica solamente cu un telefon celular na bordo pa mantene contacto. E dos hombernan a indica cu nan a pidi amigonan pa bin meya nan cu un otro boto di piscado. E boto cu a bin pa yuda Charnelle cu yama Arca, na yegada na e sitio tambe a hay’e cu problema y no por a asisti Charnelle mas. Consecuentemente MOC a bolbe dirigi e helikopter di Wardacosta pa e sitio pa por hisa e dos hombernan for di e boto Charnelle. Tambe MOC a yama y dirigi CITRO, un Metal Shark y e avion di Wardacosta pa por duna asistencia na e boto di piscado Arca.
Na yegada di e helikopter a hisa e dos hombernan di Charnelle na bordo di e helikopter. Ademas a entrega awa y cuminda na e dos hombernan na bordo di Arca. Despues di un rato e dos hombernan na bordo di Arca a logra start e motor di nobo, y como tal nan mes a logra navega direccion di Playa Piskado. CITRO a bay duna asistencia na Charnelle, y a hiba esaki na Playa Piskado.
Wardacosta ta enfatisa e importancia di bon equipo di comunicacion na bordo di un boto. Personanan cu ta navega no mester bay solamente cu un telefon celular como medio di comunicacion pasobra esaki no ta suficiente. Den caso cu e telefon celular faya of no tin señal of e bateria a caba, e contacto cu e ocupantenan riba boto por bay perdi. Un radio marino (radio VHF) na bordo ta mas confiabel pa mantene contacto cu Wardacosta of otro botonan riba lama na momento di problema.
Wardacosta ta conseha tur dueño di boto pa mantene nan boto regularmente. Sura pa bo tin suficiente equipo di seguridad y rescate na bordo manera: salvavida, flashlight, kit di prome auxilio, suficiente awa, aparato pa apaga candela, radio VHF y un telefon celular carga. Evita cu bo boto ta daña na caminda y cu bo tin un situacion peligroso riba lama cu bo boto y bo pasaheronan. Den caso cu bo mester di yudansa, bo por tuma contacto cu Wardacosta riba canal VHF 16, yama e number di emergencia 913, of manda un mensahe via Whatsapp na 005999 510 0913.
