Riba diahuebs, 17 di september 2026, Aruba lo marca historico den e sector di salud publico. Den cuadro di e conmemoracion di World Patient Safety Day 2026, Fundacion SIKI (Centro di Informacion y Conscientisacion pa Integridad) lo lansa oficialmente e prome organisacion di pashent pa pashent na nivel nacional: “Pashentnan di Aruba” (PDA).
E evento transcendental aki lo tuma luga den e aula di Universidad di Aruba, for di 7:00 PM te cu 9:00 PM. E iniciativa aki, lidera pa presidente di e fundacion, hurista Jayburtt Dijkhoff, ta busca pa transforma e relacion entre e pashent y e sistema di cuido di salud na Aruba.
E lansamento ta coincidi cu e Dia Internacional di Siguridad di Pashent, un fecha caminda e color oranje ta simbolisa conscientisacion global. E pregunta central di e campaña aki ta un cu ta toca tur ciudadano: Con bo por sinti bo safe cu e cuido di salud akinan na Aruba?
E meta primordial di e organisacion nobo aki ta pa haci cuido di salud mas sigur. Un parti significante di e accidente- o dañonan cu ta ocuri den cuido ta completamente prevenibel. A traves di PDA, kier empodera e pashent pa e tuma un rol activo, informa y determinante den su propio proceso di cuido.
E structura di “Pashentnan di Aruba” ta basa completamente riba e principio di inclusion. Tur persona den comunidad ta bonbini pa bira miembro sin ningun costo financiero, ya cu e miembresia ta totalmente gratis.
E plataforma lo sirbi pa recopila experiencia y testigonan real di pashentnan. E obhetivo ta pa transcende simpel opinion y traha riba base di data y cifranan concreto. Cu e informacion aki, e organisacion lo hiba un dialogo constructivo y directo cu e sector di salud y gobierno pa identifica e problemanan berdadero cu pashentnan ta enfrenta y busca solucionnan efectivo y duradero hunto.
Debi na e gran interes cu e iniciativa aki a genera den comunidad, e sala na Universidad di Aruba ta casi yen caba. Sinembargo, e organisacion a confirma cu tin exactamente 20 cupo ainda habri pa e publico en general cu kier presencia e momento historico aki.
E invitacion ta habri pa tur persona cu kier forma parti di e cambio aki. Pa por sigura un luga, e interesadonan por bishita e pagina di Facebook di SIKI Aruba, caminda tin e formulario di registracion disponibel. Mester yena unicamente nomber, e-mail y di number di telefon di WhatsApp pa confirma e asistencia.
